Atualità
Ejam da iagher: Iscriziuns por l’ejam de teoria ćina ai 2 de aurì
L’Ofize Ćiacia y pëscia lascia alsavëi che da śëgn ćina ai 2 de aurì saràl poscibl da se scrì ite ala pert de teoria dl ejam da iagher.
Por podëi jì a ćiacia él nezesciar da avëi l’abilitaziun da eserzité l’ativité da iagher, che vëgn conzedüda do avëi passè l’ejam da iagher. L’ejam é partì sö te n test de teoria y te n test da stlopetè. Tratan la pert teorica, che é partida sö te na proa scrita y öna a usc, vëgnel ejaminé les conescënzes di candidać sön la vegetaziun salvaria, la lege sön i iagri, les ermes, la sconanza dla natöra, i ćians da ćiacia y les tradiziuns di iagri. Daldô gnaràl spo tignì n test da stlopetè. Por se scrì ite al ejam da iagher él de bojëgn de n atestat de n "practicum por iagri" de 50 ores o de n curs por "iagri nüs" de almanco trëi dis te n’istituziun de formaziun zertificada. Al ejam po se scrì ite dötes les porsones che à complì i 18 agn.
Ćina en jöbia ai 2 de aurì saràl poscibl da dè jö les iscriziuns por la pert de teoria dl ejam da iagher. Do avëi passè la pert scrita y chëra a usc dl ejam, che gnarà tignides danter i 26 y i 30 de mà, saràl poscibl da se scrì ite ala pert pratica ćina ai 10 de jügn.
Düć i candidać ciafarà na comunicaziun scrita sön ći dè y ći ora che ai messarà se presentè al ejam. Por de plü informaziuns pon tó sö contat cun l’Ofize Ćiacia y pëscia al numer 0471 415175. Por plü informaziuns y por i formulars prëibel contatè: http://www.provinz.bz.it/forst/wild-jagd/jaegerpruefung.asp
rc
