Atualità
Cultura Ladina: “Concurs artistich 1915 – 2015”
La promoziun dl’ativité artistica, tignì a mënt i avenimënć y les conseguënzes dla Pröma Vera Mondiala y le raport atual impara 100 agn dedô: Chisc é i obietifs dl Concurs artistich 1915 – 2015 che é gnü scrit fora dala Repartiziun Cultura ladina y che é gnü aproè dala Junta provinziala. Fà para po düć i artisć dl Südtirol, de Fascia y di trëi Comuns de Suramunt.L’ultim dé por dè jö é ai 29 de mà.
La Pröma Vera Mondiala é stada la pröma vera de massa tla storia dl’umanité. Mai n’êl gnü trat ite tan de paîsc te de te’ ordinns de grandëza, y mai n'é la popolaziun zivila gnüda atocada tan diretamënter dales conseguënzes. Ala fin de chësta vera cun passa 17 miliuns de vitimes él trëi cherć dla popolaziun mondiala te na situaziun d’ezeziun.
Por tignì a mënt i avenimënć dla perioda dla Gran Vera dal 1914 al 1918 à la Junta provinziala aproè en mertesc ai 10 de merz, tl contest de na seria de scomenciadies y iniziatives en gaujiun dl centenà dla Vera, le "Concurs artistich 1915 – 2015". Le concurs vëgn scrit fora dal Departimënt Cultura y Scora ladina adöm cun Lia di artisć dl Südtirol.
„L’ert y l’ativité artistica é stromënć importanć por elaborè i avenimënć che é sozedüs tratan y do la Pröma Vera Mondiala te n lingaz universal, por splighé y visualisé la realté y la crudelté dla vera che é inće rovada te nostes valades ladines. La scomenciadia é ponsada por promöie l'ativité artistica y por sotligné l’importanza dl valur dla pêsc y dla convivënza pazifica tl‘Europa y sön le monn“, spliga l’assessur por la cultura ladina Florian Mussner che à ajuntè, che le concurs é davert à dötes les artites y düć i artisć, che à la residënza tl Sudtirol o ti comuns ladins dl Vedl Tirol (Fascia, Fodom, Col de S. Lizia y Ampëz). Implü pol tó pert dötes les artistes y duć i artisć che é scrić ite tl register AIRE de un di comuns dl Sudtirol o de n comun ladin dl Vedl Tirol.
Tramidui i obietifs prinzipai dl concurs artistich é por la Repartiziun Cultura Ladina dla Provinzia l’elaboraziun, la recordanza y la visualisaziun di avenimënć dla Pröma Vera Mondiala, sües conseguënzes y le raport atual impara -100 agn dedô y dal’atra pert le sostëgn y la promoziun dles artistes y di artisć y da svilupé inant sües capazitês. N aspet important pro l’elaboraziun dles operes d’ert sarà le contrast y la descrepanza danter la orentè y l'euforia da combate tl mëteman dla vera y la realté crödia y les conseguënzes tragiches di avenimënć dla vera, che à portè a desperaziun, crudelté y dolur. Dötes les sorts d’ert po tó pert al concurs (pitora, grafica, scoltöra, istalaziun, ert conzetuala, fotografia, video y i.i.).
L’ultim dé por dè jö é ai 29 de mà dl 2015, dales 12.00, tla sënta dla Repartiziun Cultura y Intendënza ladina. I pesć é de indöt 20.000,00 euro y vëgn partì sö insciö: por le pröm post él scrit fora 7.000,00 euro, por le secundo post 5.000,00 euro y por le terzo post 3.000,00 euro. I cin artisć y aritstes che tol pert ala mostra adöm cun les operes premiades ciafa 1.000,00 euro por la realisaziun de süa opera. La bandida dl concurs y le formular de iscriziun é da ciafè sot a: http://www.provincia.bz.it/ntendenza-ladina/argumenc/leteratura.asp.
Por plü informaziuns prëibel contatè l’Ofize Cultura Ladina, strada Binder 29, 39100, Balsan, e-mail: alexander.piccolruaz@provinz.bz.it, telefonn: 0471 / 417020.
rc
