Atualità
Junta provinziala ti Grijuns: coliamënć dl trasport local y pendolars
I coliamënć transfrontaliers y la situaziun di pendolars sura i confinns é stades les döes tematiches zentrales che é gnüdes tratades incö (12 de merz) a Cuira tratan l’incuntada dla Junta provinziala dl Südtirol cun i rapresentanć dl Chantun Grijuns dla Svizra.
Bele da 17 agn s’incunta les juntes dl Südtirol y chëra di Grijuns por tratè deboriada valgönes tematiches che reverda trames döes les realtês. Incö, jöbia ai 12 de merz, él stè le pröm iade che la Junta cun a cé Arno Kompatscher à fat vijita tl Chantun di Grijuns tla Cuira. Tla sënta dl govern di Grijuns él insciö gnü tratè incö les tematiches che reverda i coliamënć sura i confinns fora, la situaziun di pendolars dl Vinschgau y la strategia dla Macroregiun alpina.
„Les döes tematiches prinzipales atuales danter le Südtirol y i Grijuns é i coliamënć dl trasport publich y i pendolars sura i confinns. Da öna na pert orunse renforzè la colaboraziun otimala por amplié i coliamënć dles corieres y dal’atra pert dessel inće gnì inrescì le finanziamënt de n coliamënt diret cun la ferata danter le Südtirol y la Svizra. I savun che n coliamënt diret feroviar ne podarà nia gnì realisé da n momënt al ater, mo i orun pié ia cun n’analisa concreta, por capì co che n coliamënt diret podess gnì realté tl dagnì“, insciö le presidënt dla Provinzia Arno Kompatscher do l’incuntada.
Bele da agn, insciö l’assessur por la mobilité Florian Mussner, é la colaboraziun tl setur dla mobilité cun i Grijuns dër strënta. L’ampliamënt dles capazitês dles ferates y le coliamënt diret danter Mals y Balsan cun na cadënza de vigni ora é na buna basa por sostignì tres deplü le trasport publich danter i Grijuns y le Südtirol, insciö Mussner. Por mioré i coliamënć danter Scuol y Landeck y danter Mals y Landeck sarà les döes juntes dl Südtirol y dl Tirol che traterà la tematica de n punt d’incrujada a Nauders.
N’atra tematica che é gnüda tratada é stada chëra di pendolars che viajëia sura i confinns fora. Le numer di pendolars che va por motifs de laûr dala pert alta dl Vinschgau ćina tla Svizra é söporjö de 1000, recorda l’assessur Richard Theiner. Le fenomenn di pendolars che mëss se trasferì dé por dé por motifs de laûr é por le momënt inće tl zënter de na chestiun politica tla Confederaziun dla Svizra, na debatüda che ti fej inće preocupaziun ai rapresentanć istituzionai dl Südtirol. „Ti ùn raporté ala junta di Grijuns che chësta chestiun nes preocupëia, sciöche inće la forma de tassaziun nöia. Le govern di Grijuns nes à assiguré da intergnì a livel dla Confederaziun por porvè da smendrì les conseguënzes por i pendolars dl Südtirol“, insciö l’assessur Theiner do la sentada.
Por ći che reverda la strategia europeica (EUSALP) nen vara dla strategia macroalpina por le raiun alpin. Le Chantun di Grijuns y la Provinzia dl Südtirol fej pert dl comitê de gestiun, che laôra adöm cun la Comisciun Europeica por le program startegich. „La Macroregiun Alpina é gnüda istituida y sarà concreta te püć mëisc. Adöm cun nüsc partnes di Grijuns sun a öna che la Macroregiun dess sostignì dantadöt i interesc dles regiuns dles Alpes. Incö ùnse stabilì a Curia na posiziun coletiva sön les modalitês de laûr y les prioritês dla EUSALP“, insciö le presidënt Kompatscher.
rc
Galaria dales fotografies
