Atualità
Presentaziun dër garatada dl CD „Gejù cun tè poi crësce“ incö a La Val
Promöie la pasciun por la musiga di mituns, arichì les funziuns liturgiches y descedè l’interès por le lingaz dla uma: chisc é i fins prinzipai dla realisaziun dla CD „Gejù cun tè poi crësce“, na racoiüda de ćianties religioses, metüdes adöm en colaboraziun danter la scora elementara da La Val y le Ćiamp Inovaziun y Consulënza dl’Intendënza ladina, che é gnüda presentada incö tla dlijia de La Val
![](/news/img/lazy.gif)
Na racoiüda de ćianties che po gnì adorades por l’insegnamënt dla religiun, tratan les funziuns liturgiches te dlijia, mo inće te familia, te scora y en compagnia, é le resultat dl proiet coordiné da Veronica Rubatscher y realisé dai scolars y dales scolares dla 5a tlassa elementara dl’ann passè da La Val. Le layout y la grafica dla CD nöia cun le titul „Gejù cun tè poi crësce“, che é gnüda presentada incö, vëndres ai 12 de merz tla dlijia da La Val, é gnü fat dal Ćiamp Inovaziun y Consulënza dl’Intendënza ladina, co dá incé fora le CD. Dla registraziun audio se à cruzié le Studio Davide Records sot ala bachëta de Veronica Rubatscher.
L’assessur por la scora ladina Florian Mussner sotlignëia la valüta dl proiet, che „ne porta nia ma plü daimprò i mituns y les mitans al monn dl ciantè y dla musiga, mo valorisëia inće le stè adöm tratan les funziuns liturgiches y l’adoranza dl lingaz dla uma te dlijia y en compagnia“. Por l’intendënt por les scores ladines Roland Verra é „l’impëgn por portè le lingaz ladin, tres la musiga, tl insegnamënt dla religiun y tles liturgies dër important. N ater aspet che fej dër plajëi é la partezipaziun di scolars tla creaziun de materiai didatics nüs che po gnì adorà sides tl insegnamënt scolastich co inće tles funziuns liturgiches y tl tëmp lëde.“ Le diretur dl Ćiamp Inovaziun y Consulënza Felix Ploner à recordè che „cun chësc proiet unse orü alzé fora l’importanza dl insegnamënt dla religiun por nosta sozieté y la ligrëza di mituns y dles mitans da ćianté y perié adöm, desche al è te nosta tradiziun.“
L’ativité musicala di mituns va a bëgn de tröpes funziuns liturgiches y mësses cun i scolars, a chëres che ai tol pert y les abelësc cun na cornisc de ćianties y de stromënć che é dessigü n arichimënt de gran valur. „I sun dla convinziun, che plü che i mituns vëgn trać ite ativamënter y po fà para tratan les funziuns, plü che ai se tolarà para por süa vita“, sotlignëia la coordinadëssa dl proiet Veronica Rubatscher che recorda che le proiet é nasciü tres „plü ocajiuns, olache les mitans y i mituns arjignâ ca deboriada les festes liturgiches, dantadöt por les festes dla Pröma Santa Comuniun, cun reflesciuns sön le vire deboriada y la vita tla comunité y tla liturgia.“
I titui dles ćianties é: (1) Gejù, cun tè poi crësce, (2) Ćiantun gloria, a té, Signur, (3) Alleluia (4) Iö ó me daurì (5) Hosianna (6) The prayer (7) Te mi cör (8) Gejù, cun tè poi crësce (9) Bel giulan de chësc bel dé.
rc