Atualità
Renovamënt dla Provinzia, inće söl web
Le proiet de renovamënt dl’aministraziun provinziala reverda inće l’internet cun na presënza nöia che baratarà fora la misciun atuala www.provinzia.bz.it dla Rëi Zivica. Deboriada cun n demane nü ciafarà l'Aministraziun provinziala inće na süa plata d'azès y n motor de chirida efiziënt fora dla ćiasa Google, che ti po pormez a düć i contignüs y sorvisc dl'aministraziun interna.
„Le proiet – sotlignëia l’assessuria provinziala por l’aministraziun Waltraud Deeg – é na pert importanta de nosta strategia por le svilup digital 'Südtirol 2020' che à sciöche obietif chël de adorè les poscibilitês nöies dles tecnologies dla comunicaziun por scemplifiché y mioré i sorvisc por i zitadins. L'aministraziun publica à le dovëi da s'adatè ales esigënzes di zitadins y da s’ajorné cun standarg de cualité moderns.“ Dala fin dl mëis de merz sarà la Rëi zivica dla Provinzia da ciafè sot ala misciun www.reizivica.bz.it, la misciun atuala www.provinzia.bz.it deventarà estlusivamënter le portal dla Provinzia, sciöche al vëgn inće ghiré da Roma por ademplì les esigënzes iuridiches.
Deboriada cun n demane nü ciafa l'Aministraziun provinziala inće na süa plata d'azès y n motor de chirida efiziënt fora dla ćiasa Google, che ti po pormez a düć i contignüs y sorvisc dl'aministraziun interna. Ćina śëgn ê la presënza tl internet strotorada aladô de departimënć, repartiziuns y ofizi, śëgn gnaràra organisada aladô de temesc. Chësta strotoraziun dess scemplifiché la chirida de informaziuns a dötes chës porsones che ne conësc nia cis l'organigram dl'Aministraziun provinziala y les competënzes desvalies di ofizi y dles repartiziuns. L'assegnaziun di temesc é porater inće gnüda a s'al dè cun l'aiüt dl feed-back dles zitadines y di zitadins che à portè dant sües propostes tl cheder dl online-cardsorting l'ann passè da d'altonn. “Chësta divijiun sarà n aiüt por düć i zitadins che ne conësc nia a funz döt l’organigram y les singules competënzes, mo che chîr informaziuns te so ćiamp d’interés”, stlüj jö l’assessuria Deeg.
rc
