Atualità
Dala Junta: proiet dla Laimburg de suraverda sön les ês y de pestizig
Sön proposta dl assessur por l’agricoltöra Arnold Schuler à la Junta provinziala aproè incö ( 17 de merz) te süa sentada edemala i critêrs por la conzesciun de aiüć tl setur di zidla ês, sön la basa dles diretives comunitares che mët a desposiziun fonds aposta dal’Uniun Europeica.
Chësc ann él l’Uniun Europeica che mët a desposiziun dles Regiuns y dles Provinzies autonomes dla Talia complessivamënter 5 miliuns de euro por mosöres de mioramënt dles condiziuns de produtivité y por les strategies de venüda de produć che vëgn realisà tres le zidlamënt dles ês. La sudivijiun dles ressurses finanziares vëgn despartida tres la cuantité de sanć d’ês registrades sön le teritore. De conseguënza ti spetel al Südtirol por i 34.711 sanć d’ês registrà indöt 150mile euro.
La Junta provinziala à aproè incö, mertesc ai 17 de merz, les modalitês dl program anual de sostëgn che prevëiga sovenziuns por l’ativité di zidla-ês. I investimënć reverda dantadöt trëi seturs: la consulënza, les investiziuns y la suraverda dles ês.
Un di proieć che gnarà sovenzionà sarà le program de suraverda dal titul „Control Bee“ dl Zënter de Sperimentaziun dla Laimburg, cun chël che al vëgn inrescì les conseguënzes dl’adoranza de pestizig sön le zidlamënt dles ês. Un di posć d’inrescida sarà na spersa de 60 hectar dla Laimburg, olache al é gnü adorè chësc ann n program controlè de scombatimënt cuntra i inseć cun al zënter la sconanza dles ês. Cun le proiet „Control Bee“ vëgnel monitoré dé por dé l’umidité y la temperatöra al intern dl vascel dles ês, la mudaziun dl pëis y dles trates de jore dles ês.Tratan la perioda d’analisa gnaràl racoiü informaziuns sön la produziun de mil, dl stöp de flu y dla cëra dles ês. Chësta metoda d’analisa cun n sistem de relevaziun digitala pormënt resultać plü avisa sön le svilup di sanć dles ês. La dorada dles analises sarà de dui agn.
rc
