Atualità
Sostëgn por l’esport: la Junta provinziala à aproè le program 2015-16
La Junta provinziala sostëgn cun mosöres spezfiches le svilup dles aziëndes y firmes locales sön le marćé dl laûr internazional. Do che le program cun mosöres de sostëgn é gnü stlüt jö tl 2014 à la Junta provinziala stabilì incö (17 de merz) da arlungé le finanziamënt por i proscims dui agn y da le armonisé cun les normes europeiches.
Concuisté marćià nüs, aumentè la produziun y miorè la posiziun de impreses locales dl Südtirol sön le marćé dl laûr internazional: chisc é i fins prinzipai dl program de sostëgn dla Junta provinziala por aziëndes y firmes locales che ô amplié sües ativitês de venüda y colaboraziun söi marćia internazionai. Tratan le 2013 y le 2014 à la Provinzia de Balsan sostignì les aziëndes y fimes cun n program spezifich tres chël che al ê poscibl da ciafè contribuć che curî le 70 porcënt di cosć por la partezipaziun a fieres y pro manifestaziuns internazionales.
„Le bun funzionamënt dles mosöres nes vëgn inće confermè dai bugn resultać publicà da püch te n stüde dl’ASTAT“, à sotligné incö le presidënt dla Provinzia Arno Kompatscher. Dal ann 2012 inant él insciö gnü registré na chersciüda costanta dl esport cun n valur dles maćianzes esportades tl 2014 de sura n miliard de euro. Tl 2009 ê le valur complessif ćiamò de 600 miliuns de euro.
Do la contlujiun dl pröm proiet de sostëgn à la Juntra provinziala aproè incö n pachet cun mosöres nöies por i proscims dui agn ćina le 2016. „Le contribut por la partezipaziun a fieres y manifestaziuns podarà curì por i proscims dui agn le 50 porcënt di cosć. Les mosöres de sostëgn ne gnarà nia ma spartides danter les aziëndes bele atives sön le marćé dl laûr internazional, mo jarà inće a bëgn dles aziëndes plü piceres che é n pilaster fondamental por l’economia locala“, insciö le presidënt Kompatscher che ajuntëia che por mantignì la competitivité inće tl dagnì él important da se posizioné inće sön marćia nüs.
rc
