Atualità
Biblioteca Teßmann: Le Tirol tratan la Pröma Vera Mondiala
“Sciöche la popolaziun dl Kronland â viüt la Pröma Vera Mondiala”: Le storiograf y publizist conesciü Michael Forcher tignarà en jöbia ai 26 de merz dales 20 da sëra n referat tla Biblioteca provinziala sön la storia dl Tirol tratan la Pröma Vera Mondiala.
La Pröma Vera Mondiala (1914 - 1918) n'â nia ma condüt diescmilesc de tirolesc sön le frunt, mo ti â inće portè ala sozieté che romagnô zoruch a ćiasa leges speziales y limitaziuns te düć i ćiamps dla vita. Öna dles conseguënzes diretes dla detlaraziun de vera dla Talia al'Austria-Ungaria tl 1915 ê l’aumënt de podëi y de control zënza limić dles forzes armades inće tl "vedl Kronland" (terminn storich de descriziun dl raiun dl Tirol dla monarchia de Habsburg). Le Tirol ê de facto sot a na ditatöra militara che nia ma le ‘Welschtirol’ (terminn storich por le Trentin), mo inće le Südtirol d'al dedaincö y la pert a nord dl Prener messâ azetè cun conseguënzes dramatiches por la popolaziun.
Le storiograf Michael Forcher, autur dl liber "Tirol und der Erste Weltkrieg", presentarà te so referat, acompagné da proieziuns d'imajes, n valgügn raporć originai dai frunć y dla popolaziun a ćiasa che stlarësc en pröma linia la vita tl retrotera. Süa metoda da raportè di avenimënć dla vera ne vëgn nia a s'al dè tres na seria de dać statistics süć, mo cun destins de porsones singules y ejëmpli che cunta fora dla vita da vigni dé dla jënt, che al sides politics, paurs, impresars o sciampà de vera.
Le referat “Sciöche la popolaziun dl Kronland â viüt la Pröma Vera Mondiala” de Michael Forcher metarà man en jöbia, ai 26 de merz, dales 20 tla Biblioteca provinziala Teßmann a Balsan.
La Biblioteca provinziala “Friedrich Teßmann” à süa sënta tla strada Armando Diaz 8 a Balsan, telefonn 0471 471814, email: info@tessmann.it; http://www.tessmann.it/
OSP
Galaria dales fotografies
Foto: Copyright: Fotowerk Aichner
