Atualità
Dala Junta: la Provinzia se renovëia, le portal nü é online
Le proiet de renovamënt dl’aministraziun provinziala reverda inće le web. Al é tl jì online chëstes ores la verjiun nöia www.provinzia.bz.it, le portal nü che sostituësc la Rëi zivica, che arà na misciun nöia. Le proiet porta para na homepage nöia, n motor de chirida plü sterch, na navigaziun plü scëmpla y direta cun 15 plates tematiches che ti va adincuntra ales esigënzes di zitadins.
#ojeplata #sirinnova #seitenwechsel: Chisc é i trëi slogans de descriziun dla reorganisaziun dla presënza ofiziala dla Provinzia sön internet. Dan da püch à i colaboradus dla SIAG (Aziënda Informatica Südtirol) scomencè le prozés de migraziun dla plata www.provinzia.bz.it (tles trëi verjiuns tl ladin, talian y todësch) sön le sistem nü che da incö sarà dediché daldöt ai contignüs y ai sorvisc dl’aministraziun provinziala. „Na mudaziun che nes é gnü damanada da Roma por ademplì ales esigënzes de forma iuridica“, à splighé incö l’assessuria por l’aministraziun Waltraud Deeg.
Da incö (24/03) él insciö inće gnü mudé la misciun dla Rëi zivica, che sarà da ciafè sot a www.reizivica.bz.it y che restarà la fontana d’informaziun por le setur publich local che tol ite le Consorz di Comuns, les Comunitês raionales y l’Aziënda sanitara. La novité prinzipala reverda indere la homepage dla Provinzia y les 15 plates tematiches nöies, che é le pröm vare por spo la secunda fasa dl proiet che dess gnì realisé ćina l’isté 2017 cun na plata nöia por düć i departimënć, les repartiziuns y i ofizi provinziai. „La chirida é gnüda svilupada por ti gnì plü adincuntra ai zitadins, y ne é nia plü partida sö do ofizi y repartiziuns, mo do tematiches d’interés por i zitadins che ne conësc nia a funz l’organigram provinzial“, à splighé l’assessuria Waltraud Deeg che à ajuntè che chësc proiet fej pert de n percurs lunch y compliché, che se damana n cambiamënt de mentalité y na cultura nöia inće al intern dl’aministaziun publica.
La chirida di sorvisc, contignüs y ofizi vëgn alisirada por merit de n motor de chirida plü sterch. La dezijiun de partì sö i contignüs dl’aministraziun publica te 15 tematiches prinzipales é gnüda fata tres n’analisa dles plates dla Provinzia, de atres aministraziuns y tres les indicaziuns dai zitadins. Les plates tematiches é partides sö insciö: Laur y economia, Abité y frabiché, Formaziun y lingać, Ert y cultura, Politica, dërt y relaziuns cun l’èster, Aministraziun, Sanité y vita, Inovaziun y inrescida, Informatica y digitalisaziun, Agricoltöra y bosć, Segurëza y proteziun zivila, Familia, sozial y comunité, Statistiches y cumpëdes, Natöra y ambiënt, Turism y mobilité.
„Cun la realisaziun dl proiet – à stlüt jö l’assessuria Waltraud Deeg – se stlüj jö la pröma pert dla strategia dl svilup digital 2020 dl Südtirol che reverda l’inovaziun dl’aministraziun y che s'anüza dles potenzialitês nöies dles tecnologies de comunicaziun por scemplifiché y mioré i sorvisc dl’aministraziun publica.“
La secunda novité importanta presentada incö reverda le cunt digital. Dai 7 de aurì saràl plü saurì, tres n ajornamënt dl sistem informatich, da to sö contat cun l’aministraziun publica. I zitadins podarà s’anuzé insciö dles portines dles ćiases di Comuns por damanè la creaziun de n cunt digital, cun chël che an arà spo azés a prësc düć i sorvisc dl e-government dla Provinzia.
rc
