Atualità
Produc de cualité dl Südtirol al Expo 2015
Le Südtirol ará la poscibilité da trá l’atenziun de miluns de vijitadus al EXPO 2015 por merit de n stand aposta, che vëgn metü adöm chisc dis y cun chël che an presentará ince i produc de cualité (dai pom al cioce, vins, ordöra, sperjes, pirieres, produc de lat, erbes yii) dla gastronomia südtiroleja.
Dal 1 de má ai 31 de otober sará l’EXPO a Milan un di avenimënc plü importanc che roda intoronn ai seturs y ales tematiches plü desvalies de döt le monn. Por anuzé chësta ocajiun á l’EOS (Organisaziun por l’esport dl Südtirol) stabilí n contrat cun i rapresentanc di produc de cualité dl Südtirol. L’acordanza é gnüda presentada incö (25 de merz) dal diretur dl Departimënt Economia Andrea Zeppa, dal diretur dl marketing dl Consorz di vins dl Südtirol Werner Waldboth, dal presidënt dl Consorz di Pom dl Südtirol Georg Kössler, da Paul Zandanel dl EOS y da Marion Pristinger, rapresentanta dla gastronomia dl Südtirol.
„L’Expo ne é insciö nia ma n’ocajiun unica por presenté te n contest global düc nüsc produc d’ezelënza, mo dantadöt éra ince n’ocajiun por cherié sinergies y coliamënc nüs cun partners internazionai“, á splighé incö le diretur Zeppa tratan la conferënza stampa. Te chësc contest á ince le suranstant dl marketing Vins dl Südtirol, Werner Waldboth, dít che „al gnará presenté na seleziun de vins y produc desfarënc vigni mëis.“ I 5.300 hectar de coltivaziun de öa tl Südtirol fej fora le 1 porcënt dla produziun de vin tla Talia, na picera cuantité, mo de gran cualité, insciö Waldboth.
La coltivaziun de pom tól ite indere tl Südtirol zones por bëgn 18 mile hectar che pormët da prodüj vigni ann n miliun de tonelades de früc: un n pom sön dui che vëgn venü tla Talia röia dal Südtirol, le raport te Europa é un sön diesc. „Nosta intenziun ne é nia chëra da fá n coliamënt unich dl Südtirol cun un n produt mo chël de lascé n messaje a chi che vijitará le stand dl Südtirol al Expo 2015“, á dit Georg Kössler, presidënt dl Consorz di Pom dl Südtirol.
Marion Pristinger á ilustré te süa relaziun la presënza dla gastronomia südtiroleja al’intern dl conzet dl Expo „Nodrí le planët – energia por la vita“. „N slogan ideal por nosta tera che coliëia dötes les carateristichés y les spezialités dl Südtirol: les priorités dla Val de Martel, les sperjes de Terlan, l’ordöra y i ćiajos.“ Paul Zandanel dla EOS á anuzié che le „Genussfestival/Festival del Gusto“ (dai 29 ai 31 de má) gnará presenté al EXPO tratan n’edema tematica dai 11 ai 16 de má tl stand dl Südtirol. „Nosc obietif é chël da arjunje la stampa y le publich spezialisé – á comenté Zandanel – y sperun che val’vijitadú dla Expo pois ince rové sö a Balsan dai 29 ai 31 de má.“
rc
