Atualità
213 miliuns implü por la sanité y le sozial, 50 por le frabiché abitatif
Te süa secunda „tlausöra“ dl 2015 á la Junta provinziala spartí incö (27 de merz) ressurses ajuntives por 213 miliuns de euro a bëgn di seturs dl’assistënza ala cura (60 miliuns de eruro), dla sanité (38 miliuns), dl’assistënza ales families (10 miliuns) y dl frabiché abitatif (50 miliuns).
„Bele cun l’aprovaziun dl bilanz provinzial á la Junta provinziala anunzié – á recordé incö le presidënt dla Provinzia Arno Kompatscher tratan la conferënza stampa – che ara spartirá sö ressurses finanziares ajuntives ai seturs de importanza strategica. Chësc é gnü fát incö.“ Indöt á la Junta provinziala partí sö indöt 213 miliuns de euro, che röia por na gran pert (158 miliuns de euro) dal fonds de reserva dla Provinzia y da ezedënzes dl’Aministraziun publica, implü röiel ciamó lapró entrades ajuntives dal’acordanza finanziara cun le Stat, finanziamënc dala Regiun che ti speta ales döes provinzies y da fonds da Alto Adige Finance. „Tl setur sozial y dles ciases sunse stá bugn da curí completamënter les esigënzes y i ún podü mët a desposiziun dötes les ressurses finanziares nezesciares“; á splighé le presidënt Kompatscher.
La spartiziun prevëiga 60 miliuns implü por l’assistënza por la cura de porsones nia autonomes (30 miliuns vëgn dala Provinzia, 30 miliuns dala Regiun). „Cun chësta assegnaziun ún fat avisa chël che é sté preodü bele dal scomenciamënt: garantí le finanziamënt di 200 miliuns preodüs por l’assistënza por la cura“, á dit l’assessuria competënta Martha Stocker. Al’Aziënda sanitara ti él gnü assegné 38 miliuns de euro implü che gnará adorá por recuperé en pert i 9 miliuns che manciâ ala fin dl 2014 y i 40 miliuns che manciará ala fin dl 2015. „I 11 miliuns de desfarënzia messará l’Aziënda sanitara sparagné por podëi garantí n’avalianza de bilanz por le mëteman dl 2016“, á ajunté Stocker.
Cun les ressurses finanziares nöies vëgnel ince sostigní cun 10 miliuns implü les families, cun 8 miliuns l’adatamënt di contrac dl personal dla Provinzia, cun 2 miliuns les menses scolatisches y i libri de scora y cun un n miliun premies por la cura dl paesaje. 20 miliuns de euro é gnüs deponüs te n fonds por emergënzes eventuales por le 2015 y cun 25 miliuns messaral gní paié jö aretrac da bilanc di agn passá.
Implü él preodü bëgn 50 miliuns por mosöres desvalies por le frabiché abitatif. Le setur dl frabiché abitatif ará insciö a desposiziun por le 2015 indöt 190 miliuns de euro. Di 50 miliuns aprová incö dala Junta jará 20 ala cumpra y ala costruziun, 5 al programa dl IPES, 10 ai Comuns por les zones d’espanjiun y 15 ales antizipaziuns dl bonus fiscal por i ressanamënc.
rc
