Atualità
Salten/Scilier y Gherdëina: lëures de mantenimënt dla stredes
Te duta la provinzia scumëncerà l servisc stredes tl’enes che vën a fé lëures de mantenimënt straurdeneres. Tl raion Salten/Scilier uniral nvestì 1,27 milions de euro per lëures sun la stredes provinzieles y 1,31 milions per ntervënc sun la stredes stateles.“A chësta moda ulons njinië ca la stredes per i zitadins y la zitadines, acioche les sibe segures y adatedes a furné”,dij l assessëur Mussner.
Coche l assessëur Mussner sotrissea vën l mantenimënt dla stredes fat se tenian a prioriteies fissedes aldò de parametri che possa unì muserei ogetivamënter. A dì de Mussner se cunzentreien pra i lëures de mantenimënt straurdener nce chëst ann sciche l ann dant sun i lëures de curidura cun l asfalt. A chësta moda se njinien a fé na lingia de lëures d’asfaltazion sun la stredes provinzieles tl raion Salten/Scilier. I cosć de chisc lëures amudlea a 350.000 euro. Per i lëures al sofonz y ala curidura d’asfalt sun trasses de streda defrëntes dla stredes provinzieles uniral spendù 80.000 euro.
Per cie che reverda la stredes stateles tl raion Salten/Scilier tën l servisc stredes cont de dé ora de n ndut 508.000 euro per lëures d’asfaltazion y lëures sun l sofonz de stredes y trasses de stredes defrëntes.
Lëures de segurazion dl rone ie sun l program sun la streda te Gherdëina a Laion, plu avisa vëniel metù su na sief de prutezion dala smueies de 170.000 euro. Per 244.000 euro vëniel ressanà la sieves de delimitazion ruinedes sun i lëures dla streda statela de Gherdëina a Laion. Per d’autra de mëndra mesures de restruturazion y segurazion sun trasses y stredes stateles defrëntes iel udù danora 165.000 euro. 50.000 euro ie preudui per l slargiamënt dla streda d’azes ala streda cumenela Vogelweid sun la streda statela de Gherdëina a Solaion che vën realisà deberieda al chemun de Laion.
N cont dl ressanamënt de mures sun la stredes provinzieles tl raion Salten/Scilier vëijen danora ntervënc sun la streda provinziela a Ciastel/Gstatsch per 125.000 euro, sun la streda provinziela a Bulsan/Glaning per 50.000 euro y sun la streda provinziela tl Sarntal per 140.000 euro. 70.000 euro ie prugramei per mesures de prutezion dala smueies y manutenzions curespundëntes sun stredes provinzieles. Per 240.000 euro vëniel metù su na sief de prutezion dala smueies sun la streda provinziela a Jenesien. Adum cun l chemun de Tiers vëniel slargià la raida Wattlskurve sun la streda provinziela de Tiers, n ntervënt per chël che n messerà spënder 130.000 euro.
Pra i lëures de manutenzion dl servisc stredes se tratela belau mé de ncëries che vën dejëutes da mprejes pitles y mesanes, nsci Mussner. “Tl cheder dla pusciblteies lascedes pro dala lege sëurandajons chisc lëures a firmes locales; l ann passà à la firmes da tlo pudù se seguré la gran pert dla ncëries te chësc setor”, dij l assessëur. “Belau dut l budget dl servisc stredes ti va a bën dl’economia locala”, sotrissea Mussner.
rc
