Atualità
ComunClima: Start por le zertificat de efiziënza energetica nü
Le cambiamënt dl clima é na sfidada atuala, a chëra che an mëss ti respogn cun mosorës efiziëntes. Öna de chësta mosöres é ComunClima, na zertifcaziun energetica planificada por sostigní i Comuns tl vers de n svilup ecologich. „Chi che investësc por sconé l’ambiënt ara vantaji tl dagní“; á sotligné l’assessur por l’ambiënt Richard Theiner incö (09/04) tratan la presentaziun dl zertificat nü.
„N tratamënt ecologich y responsabl é d’importanza fondamentala pro le mantignimënt de nosta contrada y por n svilup sostenibl de nosta Provinzia“, chësc á dit incö, jöbia ai 09 de aurí l’assessur por l’ambiënt Richard Theiner tratan la conferënza stampa de presentaziun dl zertificat nü „ComunClima“ scrit fora dal’Agenzia CiasaClima en colaboraziun cun l’Ökoistitut dla Provinzia. Cun chësc zertificat vëgnel premié mosöres responsables che reverda la proteziun climatica y n mioramënt dl’efiziënza dl’energia di Comuns dl Südtirol. „Le Comun é n istituziun importanta che á n contat diret cun la popolaziun y che pó insciö motivé les porsones da colaboré por arjunje i obietifs de sconanza dl ambiënt“, á recordé l’assessur Theiner.
L’obietif dl proiet é da fá deventé le Südtirol tres de plü n model de ClimaLand por rové al 2050 cun n valur dles emisciuns anuales de anidride carbonica de 1,5 tonelades y le consum energetich anual por porsona de 2200 watt. Le program dl „ComunClima“ prevëiga na linia de mosöres che reverda danter l’ater: la formulaziun de n plann por la sconanza dl clima y por le sparagn d’energia, le mioramënt dl’efiziënza energetica de frabicac publics, prozesc de desgorta dl refodam, l’ilominaziun publica, l’ampliamënt dles energies renovables, conzec de mobilité sostenibla y la sensibilisaziun dla popolaziun locala. Por ciafé surandé le zertificat de „Comun Clima“ mëssel gní arjunt i obietifs de cualité dac dant. La valutaziun vëgn fata tres indicadus spezifics do catalogh de mosöres, te chël che al é ince da ciafé de plü liví de valutaziun, da na valutaziun „light“ cina a „gold“.
Le Comun de Türesc sará le pröm Comun che ciafará chësc zertificat nü, deache al á metü da jí plü mosöres ti seturs dl frabiché, dl’alimentaziun d’energia, dla mobilité y dl’organisaziun interna dl Comun. Ejëmpli é danter l'ater i standarg de CiasaClima A, costruziuns publiches nöies, l’adoranza de energia renovabla,le car-sharing y la contabilité energetica. „Cun le proiet ComunClima – á stlüt jö le diretur dl’Agenzia CiasaClima Ulrich Santa – orunsé colié i dui proiec de CiasaClima y ClimaLand. Ince da fora dl Südtirol nes él bele gnü segnalé interes por chësc zertificat nü.“
USP
Galaria dales fotografies
Foto USP/rm
