Atualità
Stocker: „Sensibilisé les families por les adoziuns“
La poscibilité da ti dé na familia a n möt/na möta é la chestiun zentrala dl’adoziun. Cun na campagna de sensibilisaziun nöia y le slogan „Na storia n pü’atramënter: mia adoziun“ á l’assessuria Martha Stocker presenté incö (09/04) chësta forma particolara de relaziun familiara por sensibilisé i zitadins sön chësta tematica.
La dezijiun da ti dé na ciasa a n möt y/o na möta de n’atra familia, de n ater Paisc y insciö ince de n’atra cultura ne é nia na dezijiun saurida da tó, sön chëra che an mëss ponsé sura te na manira prezisa y por chëra che al é ince debojëgn da se arjigné ca avisa.
Cun articui d’acompagnamënt, stories cuntades da porsones diretamënter interessades, placac nüs, contribuc te programs televisifs, inserziuns mirades y l’organisaziun de n convëgn che gnará tigní a Balsan ai 19 de novëmber, mët da jí chësc ann la Repartiziun Politiches soziales na campagna de sensibilisaziun nöia por aumenté l’interes di zitadins sön la tematica dl’adoziun. L’obietif é chël da raforzé la cosciënza di zitadins y la solidarieté por i mituns che por motifs speziai ne á degöna familia.
„Eduché mituns y mitans ne é nia n compit saurí y che porta para na gran responsabilité. La sfidada é ciamó plü grana sce i mituns ne é nia i tü“, á splighé incö, jöbia ai 9 de aurí, l’assessuria por les politiches soziales Martha Stocker che á sotligné che „dal’atra pert porta l’adoziun de n möt ince a n gröm de esperiënzes de vita che ti vëgn ma conzedüdes ai geniturs cun mituns adotá.“
Por i placac dla campagna él gnü chirí fora le slogan „Na storia n pü atramënter: mia adoziun“ che dess sotligné la forma speziala de relaziun danter geniturs y mituns. „La campagna fej pert de na seria de scomenciades y aziuns, che vëgn metüdes da jí da istituziuns desvalies che laora tl ciamp dl’adoziun tl Südtirol“, á sotligné l’assessuria.
Tl 2014 él gnü adoté complessivamënter 25 mituns, de chisc 5 da n’adoziun statala y 20 da n’adoziun internazionala. La gaujia che la campagna de sensibilisaziun é gnüda metüda da jí é chëra che le numer dles adoziuns é jüdes zoruch tl Südtirol ti ultims agn. Petra Frei dl Ofize por la proteziun di mituns y dl’intlujiun soziala á splighé l’organisaziun dl’adoziun a livel nazional, les normatives y les particolarités dles formes desvalies d’adoziun. Tl caje de n’adoziun nazionala vëgn i mituns adotá dal teritore dla Talia, ince sce ai pó ester da foradecá. Tl’adoziun internazionala vëgn i mituns indere da d’atri Paisc. Frei á ince sotligné che al ne esist nia na perioda de speta dada dant por geniturs che aspeta na resposta por les adoziuns.
I compic dl Sorvisc Adoziuns dl Südtirol é gnüs presentá da Silvia Vitale y reverda l’acompagnamënt dl prozes d’adoziun tles singules fases. Dër ütla y interessanta é stada l’esperiënza portada dant da Alessandra Martinez y Bilberto Antonucci, i geniturs adotifs dla picera Margherita, na möta dl’Etiopia che é gnüda adotada dan da dui agn, canche ara â ciamo cinch agn. „N esperiënza che nes á fat deventé plü ric y te chëra che la picera Margherita nes á acompagné cun n spirit daldöt natural“, insciö i geniturs.
USP
Galaria dales fotografies
