Atualità
Kompatscher sön le comerz de vijinanza: Sostëgn sön dui pilastri
Le comerz de vijinanza funzionëia tl Südtirol ciamó sön döt le raiun, por mantigní chësta situaziun laora la Provinzia te döes direziuns: da öna na pert cun normes d’atuaziun por garantí na politica comerziala de dorada lungia, dal’atra pert cun n aiüt diret por sostigní le refornimënt di alimentars de basa. Chësc é gnü splighé incö dal presidënt Arno Kompatscher te n'incuntada cun i media.
Le situaziun dl comerz de vijinanza, dles botëghes de alimentars che é da ciafé tles localités dalunc dai zëntri dles cités, é gnüda analisada incö, vëndres ai 10 de aurí, dal presidënt dla Provinzia Arno Kompatscher che á presenté de plü mosöres por mantigní la rëi dles botëghes partides sö sön döta la Provinzia. Le presidënt á ince fát n pröm bilanz dal’introduziun dl sostëgn diret a chëstes ativités de comerz local. Nia por caje él insciö gnü chirí fora sciöche post dla conferënza na picera botëga de paisc dla familia Öhler tl Comun de Ritten, öna dles 53 botëghes che á ciafé tl 2014 n finanziamënt da pert dla Provinzia, deache ara á ademplí a düc i critérs dac dant. „Indöt ti él gnü conzedü a 53 botëghes dl Südtirol 543.500 euro de aiüc, che fej fora n valur mesan de 10mile euro por botëga“, á splighé le diretur dla Repartiziun Economia Hansi Felder.
Le presidënt Kompatscher á sotligné che chësta mosöra é un di dui pilastri che la Junta provinziala á definí por sostigní te na manira capilara le comerz de vijinanza sön döt le teritore dl Südtirol sön dorada lungia. „Tl Südtirol é la vita di paisc ciamó na realté che funzionëia dër bun. Ma ti ultims agn él gnü registré n valgügn sëgns de n cambiamënt global che mët ince na certa presciun ales piceres strotöres comerziales de nüsc paisc. Por chësta gaujia é nosc obietif chël da lauré inant, sciöche ti ultims dezenns, cun mosöres comerziales efiziëntes y nosc sforz sará chël da lauré inant sön na norma d’atuaziun dl Statut d’autonomia che nes garantiss la proteziun de chësta situaziun ince tl dagní.“
L’atra direziun é chëra ti garantí le sostëgn ales piceres botëghes de comerz dles vijinanzes ti pici paisc dl Südtirol. Le sostëgn finanziar vá a bëgn de botëghes de comerz che á na varité ampla de alimentars y de produc che vëgn adorá cuotidinamënter. La regolamentaziun scrí dant che por avëi n contribut ne pó le davagn di ultims trëi agn nia superé i 400mile euro, che la proscima botëga mëss ester plü co 2,5 chilometri dalunc y che la localité mëss avëi almanco 150 abitanc. Implü ne pó nia lauré plü co trëi porsones a tëmp plëgn te botëga, la spersa de venüda ne pó nia superé i 150 metri cuadrac y al mëss gní garantí n orar de daurida por 3 ores al dé por sis dis al’edema. Les domandes por n contribut por le mantignimënt dles botëghes pó gní dades jö cina ai 31 de má, les domandes do n sostëgn por la daurida de na botëga nöia pó gní dades jö cina ai 31 de má y ai 30 de setëmber.
rc
Galaria dales fotografies
