Atualità
Reforma sanitara: De plü grups de laur planifichëia i proscims vari
Do l’aprovaziun dla reforma sanitara da pert dla Junta provinziala él gnü tigní incö (13 de aurí) n’incuntada danter i rapresentanc dla Repartiziun Sanité y dl’Aziënda sanitara dl Südtirol por stabilí i proscims vari por la realisaziun dla reforma.
Tratan n’incuntada s’á i rapresentanc y suranstanc dla Repartiziun Sanité y dl’Aziënda sanitara dl Südtirol dé jö incö, lönesc ai 13 de aurí, cun la programaziun di proscims vari che reverda la reforma sanitara dl Südtirol. „Al sará n gran numer de esperc che studiará ti proscims mëisc y agn le prozes de realisaziun dl proiet dal inom 'Assistënza sanitara 2020' “, á sotligné l’assessuria por la sanité y les politiches soziales Martha Stocker.
Les carateristiches y modalités dla reforma sará tl zënter de n’analisa che gnará fata dai rapresentanc di Raiuns soziosanitars, dai partner soziai y dales organisaziuns di paziënc. I punc zentrai che gnará studiá sará la reforma dl’aministraziun, l’assistënza sanitara di ospedai dl Südtirol y le plann provinzial dla sanité nü, che gnará ejaminé cina la fin dl ann da dötes les istituziuns competëntes. „Le cheder complessif por la realisaziun dla reforma sará de cin’agn“ á sotligné l’assessuria Stocker che á injunté che i pröms resultac dla reforma podará plüssigü bele gní presentá tl 2015.
rc
