Atualità
Euregio Summer Camp por mituns a Balsan: ciamó posć lëdi
„N’edema de incuntades“: chësc é le moto dl’ediziun 2015 dl Summer Camp dl’Euregio Tirol-Südtirol-Trentin che vëgn organisada por 60 jogn dai 11 ai 14 agn dai 19 ai 26 de messé tl’Istitut Rainerum de Balsan. Al é ciamó posć lëdi, les iscriziuns po gní dades jö cina al pröm de jügn tl Ofize Euregio de Balsan.
Le Euregio Summer Camp vëgn organisé chësc ann por le terzo iade dal’Euregio Tirol-Trentin-Südtirol por jones y jogn dai önesc ai catordesc agn. Le fin dla scomenciadia é chël da colié la jonëza dles trëi provinzies por inrescí deboriada la storia y la richëza dles varietés culturales y linguistiches dl’Euregio. Tres jüc y ativités de tëmp lëde pó i partezipanc studié te na manira plajora les tematiches dla storia y dla cultura dles trëi regiuns dl Vedl Tirol.
Al’Euregio Summer Camp pó se scrí ite mitans y mituns nasciüsdes y nasciüs ti agn 2001/2002/2003 cun conescënzes de basa di lingac todësch y talian. Le summer camp vëgn organisé da en domënia ai 19 a en domënia ai 26 de messé cun la sënta prinzipala tl Istitut Rainerum de Balsan tla strada Carducci 7. Les iscriziuns po gní dades jö cina al pröm de jügn.
Le presidënt dla Provinzia Arno Komaptscher, che á bele fát l’ann passé na vijita al camp a Neustift, recorda che chësta scomenciadia fej incunté i jogn y dëida da fá amizizies sura i confinns provinziai. „Le sté adöm di jogn renforzëia ince l’Europaregiun.“
Informaziuns y iscriziuns: Ofize de comunanza GECT EUREGIO Tirol-Südtirol-Trentin, strada Druso 1 a Balsan, tel. 0471 402026, fax 0471 405016, info@europaregion.info - www.europaregion.info/summercamp
rc
