Atualità
La rapresentanza de jëne te politica é le tema nü de ëresFraueninfodonne
L'ediziun nöia dla revista dla Comisciun provinziala por l’avalianza dles ëres dal inom „ëres – Fraueninfodonne“ tematisëia te süa verjiun plü atuala la rapresentanza de jëne tla politica cun n'odlada ales proscimes eleziuns comunales dl mëis de má te Südtirol.
Fá politica a livel local é por les ëres ince ciamó aldedaincö na gran sfidada. N dat positif é che dales ultimes eleziuns aministratives, dan da cinch agn, él gnü registré n aumënt de ëres tles istituziuns politiches. Dles dificoltés dles ëres da tó pert ativamënter ala vita politica nen n’él gnü baié tratan la pröma sentada deboriada danter les ëres che é gnüdes litades tl Tirol y tl Südtirol, y che é gnüda tignida ala fin de merz dl 2015 a Balsan. Le contignü dla sentada é sté de motivaziun por l’ediziun nöia de „ëres“ por confronté la rapresentanza politica dles ëres tl Südtirol cun chëra dl Tirol. L’ediziun nöia contëgn ince na tuta de posiziun de Christine Baur, assessuria por l’avalinza dles oportunités dl Tirol.
Ince la ministra austriaca por la familia Sophie Karmasin, l’esperta de politica Kathrin Stainer Hämmerle y Roberta Mori, la coordinadëssa nazionala dla Conferënza dles Comisciuns regionales por l’avalianza dles oportunités, nes presentëia tla revista nöia so punt d’odüda sön la chestiun dles ëres tla politica.
En guajiun dl Equal Pay Day, che vëgn tigní ai 17 de aurí, él la Comisciun por l’avalianza dles oportunités che fej para ala campagna „we’re NOT THERE yet“ metüda da jí dala Clinton Foundation con chëra che al vëgn damané da tó demez les ëres dales prömes plates dles revistes y di placac por protesté cuntra la desbalanza danter i ëi y les ëres. Al fej para a chësta scomenciadia ince le foliet conesciü „VOGUE“. Por chësta gaujiun é la revista „ëres“ gnüda publicada te döes verjiuns, chëra tradizionala y öna zënza imajes sön la pröma plata.
L’ediziun atuala pó ince gní desciariada sön internet tres la misciun http://www.provincia.bz.it/pariopportunita/eres.asp, al é ince poscibl da damané n abonamënt pro l’Ofize Ëres, via Dante 11 a Balsan.
rc
