Atualità
Dala Junta: bilanz SEL, fondamënta sterscia por la fujiun
Dal 2011 al 2014 á la sozieté dla SEL investí indöt 92,5 miliuns de euro por le refornimënt cun energies renovables, de conseguënza él sëgn 24.000 families implü tl Südtirol che s’anüza de energia sostenibla. Chëstes y d’atres zifres ti é gnüdes presentades incö (21/04) ala Junta provinziala dal presidënt dla SEL, Wolfram Sparber.
Tl’edema da denant â la Junta provinziala aprové le Consëi d’aministraziun dla sozieté SEL AG, denant âra bele dé löm vërda por la fujiun danter les döes sozietés SEL y AEW. „I ultims trëi agn, dal 2011 al 2014, é stá dër complicá por la sozieté energetica dla SEL cun na seria de chestiuns iudiziaries“, á sotligné le presidënt dla Provinzia Arno Kompatscher che á ajunté: „Impó é la sozieté stada buna da se renforzé y da ciafé soluziuns importantes cun plü partners de colaboraziun locai, chëstes acordanzes arjuntes é la basa por la reorganisaziun de döt le setur dl'energia te Südtirol.“
Dal ann 2011 cina l’ann 2014 á la sozieté SEL AG lauré te plü direziuns che reverda la restrotoraziun interna, le svilup dl controlling y dl auditing y á insciö garantí n’aumënt dla stabilité, dla trasparënza y dla suravijiun de düc i prozesc al intern dla sozieté. Ince tl setur dles infrastrotöres él gnü fát de gragn vari inant: insciö á la SEL investí ti ultims trëi agn indöt 92,5 miliuns de euro por le refornimënt cun energies renovables, cun la conseguënza che incö él 24.000 families che s’anuzëia de fontanes d’energia renovabla.
Dal 2012 al 2014 él gnü sovenzioné la rëi dla forza eletrica cun 45 miliuns de euro, che á porté a aumënc tla cualité dl trasport y tl refornimënt energetich. Implü ti él gnü surandé dal 2011 al 2013 a 25 Comuns indöt 22,8 miliuns de euro, cun chi che al é sté poscibl da finanzié na seria de mosöres ambientales diretamënter söl post. „Chëstes zifres nes confermëia le bun svilup dla politica dl'energia südtiroleja, y é ince na fondamënta sterscia por la fujiun danter la SEL y l’AEW, che sará nia ma n valur implü por l’economia locala, mo dantadöt por la popolaziun dl Südtirol“, á sotligné l’assessur por l’energia Richard Theiner.
rc
