Atualità
Temesc dl mëis nüs sön la homepage dl’Euregio
Le museum di lüsc da paur dl Tirol, i controls söl confin dl Prener y la cooperativa Leit Motiv cun sües interpretaziuns creatives dla cultura dl’Euregio é i trëi temesc dl mëis dla plata internet ofiziala dl’Euregio www.europaregion.info.
Sciöche vigni mëis vëgnel presenté sön la plata internet dl’Euregio Tirol – Südtirol – Trentin trëi tematiches sot ala seziun „profils“ cun l’obietif da presenté vigni mëis d’atri aspec interessanc dl raiun dl’Euregio. Le personaje dl mëis ne é chësc iade nia na porsona, mo la cooperativa culturala de Leit Motiv. Le grup de Leit Motiv é metü adöm da rapresentanc de düc trëi i raiuns, da Sara Sciortino da Balsan, Marco Russo da Desproch y Laura Marongiu da Rovereto. Le team dl’Euregio á acompagné i responsabls de Leit Motiv tratan n proiet a Balsan, le video é da ciafé sot a: www.europaregion.info/it/leit-motiv.asp.
La tematica iuridica dl mëis é chësc iade la chestiun di controi söl confin dl Prener, che é gnüs tuc demez do les acordanzes de Schengen por i zitadins europeics che ô passé i confins al’intern dl’Uniun europeica. Les porsones che se möi da un n Paisc al ater dla Uniun Europeica ne vëgn nia plü controlades öna por öna, sciöche Harald Baumgartner dla polizia de confin sön le Prener nes spliga tl'intervista: www.europaregion.info/it/ablauf-und-rechtlicher-rahmen-fuer-grenzkontrollen-am-brenner.asp.
Le post dl mëis é le museum di lüsc da paur dl Tirol, che é gnü fondé tl 1974 danter Desproch y Kufstein, tl raiun di lec de Kramsach. Al se trata de n museum alaleria te chël che al é poscibl da amiré 14 lüsc da paur y 24 d’atres strotöres, dötes portades dala posiziun originala cina al post tla spersa dl museum olache ares é indô gnüdes metüdes adöm cun na gran prezijiun. Le video é da odëi sot a: www.europaregion.info/it/museum-tiroler-bauernhoefe.asp.
rc
Galaria dales fotografies
