Atualità
Dala Junta: rëi y strotöres de sostëgn por i profugs
Vigni dé passél tla staziun dla ferata a Balsan danter 150 cina 200 profugs. La Junta provinziala á traté incö (28 de aurí) la situaziun che reverda la rëi d’aiüt y les strotöres de sostëgn por les porsones che röia adalerch. “L'Aziënda dles ferates dl Stat á detlaré so consens por mët a desposiziun n valgügn locai por organisé damí l’acoliënza temporana”, á anunzié l’assessuria Stocker.
“I profugs – á splighé incö (28/04) l’assessuria provinziala por les politiches soziales Martha Stocker – röia normalmënter te Südtirol te grups da 30 cina 60 porsones, ai se möi te manira autonoma, nia organisada y ó jí inant tl vers dl Nord. “ Sciöche al é gnü sotligné dal’assessuria Socker, che ti ultims dis á fat de plü suralüsc tla staziun de Balsan, “é les porsones te na situaziun sanitara valgamia buna, y ince en presënza de tröpes problematiches, pon dí che la situaziun é atualmënter sot a control.”
L’assessuria provinziala á sotligné, conscidran la orenté di profugs da adoré la staziun de Balsan sciöche na tapa de transiziun de so percurs, che al "ne é degun bojëgn da garantí na sistemaziun permanënta". Te vigni caje – á sotrissé Stocker – é nosc compit chël da ti pité n’assistënza umanitara y sanitara por le tëmp che les porsones é te nosc teritore: por le momënt, ince sce al é plü dificoltés, ne él nia preodü mosöres d’emergënza.”
La Provinzia, te vigni caje, colaborëia tresfora cun la Cuestöra, le Comissariat dl Govern, la polizia feroviara, l'Aziënda dles ferates dl Stat y l’assoziaziun “Volontarius” che coordinëia i aiüc, da öna na pert por ti dé les informaziuns nezesciares ai profugs, mo ince al’intern dla staziun dla ferata cun aiüc de prescia. “Le contribut di volontars é dër prezius – á ajunté Stocker – mo al é debojëgn che ai vëgnes ince reconesciüs al’intern dla staziun. I ún ince ciafé le consens da pert dl'Aziënda dles ferates dl Stat por anuzé n valgügn locai dlungia la scina numer un por n’acoliënza provisoria di profugs."
Por ci che reverda la cuota di profugs che ti vëgn assegná al Südtirol sön la basa de na tlé de spartiziun a livel statal, á l’assessuria anunzié che indoman (29 de aurí) él preodü che al röies adalerch 10 porsones, “che gnará spartides sön strotöres che é bele en funziun”. Implü ál ince metü man le prozés d’individuaziun de sperses y strotöres publiches y privates, adöm ai Comuns, por ciafé frabicac che podess gní adorá por la sistemaziun de profugs. “I orun garantí na spartiziun iüsta sön döt le teritore – á stlüt jö Stcoker – mo la situaziun dl’emergënza umanitara di profugs dess tlafinada ince gní tratada te na manira definitiva dal’Uniun Europeica.”
rc
