Atualità
Le premier Renzi a Balsan: percurs deboriada por renforzé l’autonomia (1)
Renforzé y svilupé inant deboriada l’autonomia: chësc é le resultat da incö (05/05) dl’incuntada danter le premier Matteo Renzi y i dui presidënc dl Südtirol y dl Trentin, Kompatscher y Rossi, che á concordé le program che prevëiga l’aprovaziun tl 2015 de normes d’atuaziun nia ciamo aprovades, la formaziun de plü grups de laur sön competënzes nöies y la metoda de laur por ajorné le Statut.
„I orun valorisé l'autonomia y l'identité, tl medemo momënt ne ti orunse tó nia ales carateristiches spezifiches, mo lauré inant por ejaminé plü competënzes poscibles da surandé tl percurs des reformes. Chësc te n contest de colaboraziun", chësc á dit incö le premier Matteo Renzi do l'ateraje dl jore a Balsan tratan süa vijita incö, mertesc ai 5 de má, tratan chëra che al á incunté i presidënc dles Provinzies Arno Kompatscher y Ugo Rossi. Cun le premier él insciö gnü aprofondí les proscimes mosöres de ajornamënt dl’autonomia y al é gnü concordé n program che prevëiga cina la fin dl 2015 l’aprovaziun de normes d’atuaziun che reverda la surantuta dles competënzes d’aministraziun di ofizi dles signories, les funziuns aministratives dl TAR da Balsan y chëres dl parch nazional dl Stelvio. Le memorandum prevëiga ince l’aprovaziun dles normes d’atuaziun che reverda la re-ativaziun dles competënzes provinziales ti seturs dles ativites de comerz, dl’urbanistica (dantadöt por ci che reverda la destanza minima de un n frabicat al ater), di apalc, dl ordinamënt y dl laur dl personal dl’aministraziun provinziala y di ënc dependënc. Implü él gnü ciafé n’acordanza ince sön l’aprovaziun cina la fin dl 2015 dles normes d’atuaziun sön les mudaziuns dl’adoranza di lingac ti ofizi iuridics y aministratifs, sön l’ordinamënt finanziar nü dles Regiuns y dles Provinzies autonomes, sön la toponomastica y sön l’atuaziun dl’acordanza Delrio-Durnwalder.
Le percurs deboriada danter le Govern y les autonomies prevëiga ince la creaziun de grups de laur danter le Stat y les Provinzies de Balsan y Trënt por ci che reverda les tematiches dla ciacia, dla scora y dla formaziun di insegnanc y de n valgönes competënzes nöies. „Sciöche le premier á sotligné ne jarara tl dagní dessigü nia de na diminuziun dles competënzes, mo da confermé les competënzes atuales y da analisé n ampliamënt de chëstes“, á dit Kompatscher. „I ún concordé sön la metoda de laur por rové deboriada al ajornamënt dl statut, sciöche ince preodü dal percurs de reforma costituzionala che scri dant che les mudaziuns pó ma gní fates en acordanza danter le Stat y les Provinzies. Tres chësc prinzip sarál sëgn da lauré adöm ales delegaziuns di parlamentars y dla comisciun di 12“, á sotligné i presidënc Kompatscher y Rossi. Chëra da incö é stada „n’incuntada positiva cun Renzi y che é gnüda a se le dé por merit de nüsc parlamentars a Roma“, á stlüt jö Kompatscher.
rc
Galaria dales fotografies
