Atualità
Dé dl’Europa ai 12 de má tl Zënter cultural dl Grand Hotel a Toblach
En mertesc ai 12 de má dl 2015 vëgnel tigní tl Zënter cultural Grand Hotel a Toblach dales 09.00 ales 17.00 na seria de scomenciadies en recordanza dl aniversar dala fondaziun dl’Uniun Europeica.
L’Europa fej festa ai 09 de má, dé de süa fondaziun. Les trëi Intendënzes scolastiches y l’Info Point Europa dla Provinzia organisëia en chësta ocajiun n dé dl’Europa tl Zënter cultural Grand Hotel Toblach. L’obietif é chël da porté plü daimpró i partezipanc ales vijiuns europeiches y da ti dé informaziuns ütles sön les mosöres de finanziamënt tres fonds dal'UE.
La manifestaziun gnará inaudada
en mertesc, ai 12 de má dl 2015
dales 09.00
tl Auditorium Gustav Mahler
tl Zënter Cultural dl Grand Hotel
strada Dolomiti 31
a Toblach
dai intendënc Roland Verra, Nicoletta Minnei y Peter Höllrigl, adöm a Graziano Molon, le diretur dla Repartiziun Europa dla Provinzia.
Tratan le dé gnarál presenté la storia dl’Uniun europeica, al gnará fát n quiz y dé informaziuns sön les oportunités de formaziun sciöche l’Erasmus y l’ eTwinning (le program é gnü injunté). Ales manifestaziuns s’ál bele scrit ite n gröm de tlasses de scora cun sura 400 studënc. Domisdé gnarál presenté plü avisa co che al funzionëia la realisaziun de proiec concrec sciöche Interreg, FESR, FSE y che podess interessé i comuns, les assoziaziuns y les imprejes. Al sará ince presënc de plü esperc dla Repartiziun Europa dla Provinzia y dl Ofize Integraziun europeica che sará a desposiziun por spligaziuns.
Informaziuns y iscriziun: Ofize por l’integraziun europeica. Europe Direct Alto Adige, Petra Sevvi, telefonn: 0471 413176, e-mail: petra.sevvi@provincia.bz.it
rc
