Atualità
Lites comunales 2015: Invit da jí a lité dl presidënt Kompatscher
Les zitadines y i zitadins dl Südtirol é inviades y inviá da jí a lité en chësta domënia, ai 10 de má, i aconsiadus y i ombolc de 109 comuns dla Provinzia dl Südtirol. Le presidënt dla Provinzia Arno Kompatscher inviëia düc i zitadins da adoré so dërt de lita: „Jí a lité ó dí rajoné para, dantadöt a livel comunal. Chi che ne vá nia a lité ti lascia la dezijiun sön le dagní ai atri.“
Por le presidënt dla Provinzia Arno Kompatscher é les lites comunales na posciblité direta y fondamentala de partezipaziun zivila y politica, cun chëra che i zitadins á n influs diret sön les chestiuns che reverda döta la comunité. „Dala desgorta dl refodam cina al’injunta sön la cuta söl davagn: i ombolc, la junta y le consëi de comun tól dezijiuns te n gröm de seturs che reverda la vita de düc nos. Ma chi che dá jö süa usc ai 10 de má tol pert ativamënter a chësc prozés de dezijiun dla politica comunala."
Cina l’eleziun tl Consëi provinzial ê sté le presidënt dla Provinzia Kompatscher naôta vize-ombolt y spo ombolt dl Comun de Fié, sciöche ince presidënt dla Lia di Comuns y dl Consëi di Comuns y sá insciö dla gran valüta dla partezipaziun por porté inant les ghiranzes di zitadins. „Ti comuns é le barat danter i zitadins y la politica le plü diret: les dezijiuns che vëgn tutes tl Consëi de comun á conseguënzes diretes tla vita da vigni dé di zitadins dl comun.“
La Junta provinziala á detlaré sciöche un di obietifs prinzipai de so program de coaliziun le prinzip de sussidiarité, sciöche ince le presidënt dla Provinzia sotlignëia: „Öna dles ghiranzes prinzipales dla Junta provinziala é chëra da organisé l’aministraziun publica aladô dl prinzip de sussidiarité y da mët insciö les competënzes plü daimpró ai zitadins. Por i Comuns dessel insciö gní aumenté les poscibilités da tó dezijiuns de competënza.“
„Avëi influs á ma les porsones che s'anüza de so dërt de lita, y che ti dá la usc ai candidac che do süa minunga rapresentëia le miú i interesc dla coletivité“, sotlignëia Kompatscher. Le dërt de lita é un di pilastri dla democrazia che confermëia la sovranité di zitadins: „Plü gran che le numer di litadus é, plü sará spo la rapresentanza politica legitimada ince democraticamënter“, stlüj jö le presidënt Kompatsche che inviëia insciö düc i litadus y les litadësses da jí a dé jö süa usc en domënia ai 10 de má.
rc
