Atualità
Colaboraziuns culturales: Ince n proiet dl Südtirol pro i 64 aprová dal'UE
Cun „Spread“ él ince na scomenciadia dl Südtirol che fej pert di 64 proiec che ciafará n sostëgn finanziar tres le program de promoziun culturala europeich „Creative Europe“. Le proiet „Spread“ é na cooperaziun danter la Fondaziun Gustav Mahler, le „Monteverdi Choir and Orchestras“ de Londra y n’orchestra jonila dai Paisc Todësc.
Le program „Creativa Europe“ dl’Uniun Europeica á le fin da sostigní la cooperaziun danter les organisaziuns culturales de plü Stac dl’UE, la creaziun de paladines nöies y de na rëi de barat cultural europeica. Por sostigní chisc fins él l’UE che finanziëia proiec de cooperaziun danter plü Stac. Indöt él gnü presenté 476 proiec da plü Stac, l’Uniun Europeica nen á aprové 64 che gnará finanziá tres le fonds „Creative Europe“, cun na soma de sostëgn mascimala de 200.000 euro por proiet.
Dala Talia él gnü aprové indöt 9 proiec, danter chisc ince un che vëgn dal Südtirol. Al se trata dl proiet „SPREAD“ dla Fondaziun Gustav Mahler de Balsan che ó mët adöm na rëi danter 3 orchestres europeiches por mioré la formaziun profescionala di jogn musizisć y daidé insciö i jogn y les jones da mioré les tecniches desvalies y da imparé da conësce de plü metodes dl soné te n'orchestra.
Te chësc proiet sarál la Fondaziun Mahler, che é gnüda fondada tl 1999 dal maester Claudio Abbado, che ará la direziun de n consorz, te chël che al fej pert l’orchestra jonila Gustav Mahler, le „Monteverdi Choir and Orchestras“ de Londra y l “Ostfriesische Landschaft de Aurin“ di Paisc Todësc.
Tla fasa de preparaziun é la Fondaziun Mahler gnüda daidada dal €uro-Helpdesk, sciöche ince dal Ofize integraziun europeica dla Provinzia y dal Ofize de Bruxelles che dëida les imprejes, i zëntri d’archirida, i ënc de formaziun y les assoziaziuns da presenté domandes por contribuc dal'Uniun Europeica. Tratan le proiet él preodü de plü ores d’insegnamënt por imparé da soné musiga d’orchestra mo ince ores d’insegnamënt che reverda l’organisazun de evënc por sensibilisé dantadöt i jogn. I partezipanc gnará chiris fora da döta l’Europa, ai tolará pert ales ores d’insegnamënt dl’Academia Mahler da Balsan y ai podará tigní n conzert tratan le festival dla musiga tlassica organisé dal partner todësch de Aurich o ai podará tó pert a un di proiec metüs da jí dal’orchestra de Londra.
rc
