Atualità
60 ani scola auta Raetia: ai 22 de mei uniral fat festa
N ucajion di 60 ani dl Istitut Tecnich Economich Raetia uniral festejà ai 22 de mei tla Cësa de Cultura Luis Trenker a Urtijëi. La scola mët a jì n program desvalif. Nce l assessëur Florian Mussner, che fova n iede sculé dl Istitut Tecnich Raetia, tulerà pert ala festa.
Cun videos, teatri, descuscions y prejentazions uniral mustrà su i ultimi 60 ani de chësta scola. Sambën uniral nce prejentà i proiec atuei. L ti unirà dat la parola à ex sculeés y sculeies sciche Florian Mussner, Claudia Bertuolo, Eveline Moroder, Hansi Felder, Lorenz Großrubatscher, Matteo Murer, Peter Mussner, Alexander Prinoth, Evelyn Insam, Verena Stuffer, Nicole Delago, Samuel Costa, Romed Moroder y Reinhard Schmalzl. L sunerà la grupa “Cominais”.
N chësta ucajion uniral dat ora na edizion speziela dla zaita dla scola “Orange Juice”. Sëuraprò uniral prejentà la plata facebook dla scola. La festa mët man dala 9.00 danmesdì; l tulerà sambën nce pert l Ntendënt Roland Verra y l diretëur de Repartizion Alexander Prinoth.
L Istitut Tecnich Economich Raetia pieta trëi sezions: aministrazion, finanzes y marketing, turism y aministrazion, finanzes, marketing y sport. Sëuraprò ala rujenedes talian, tudësch y ladin vëniel nce nsenià nglëisc y spanuel.
Duc i media
ie de cuer nviei
ala festa di 60 ani
dl Istitut Tecnich Economich Raetia
n vënderdi, ai 22 de mei 2015 dala 9.00 tla
Cësa de Cultura Luis Trenker a Urtijëi.
rc
