Atualità
Arge Alp: Presentades les "best practices" ti raiuns dai schi
25 proiec ti raiuns dai schi é gnü valutá da sis partner dl Arge Alp cun n concurs che reverda la sostenibilité, la sconanza dl ambiënt y la mobilité sostenibla. „Danter i proiec che á davagné él ince da ciafé la furnadoia sön Munt de Suc, le coliamënt feroviar Plan de Corones-Perca y le coliamënt Moena/Soraga – Jouf de Ciareja“, insciö l'assessur Mussner incö ala presentaziun.
Le concurs „Best practices ti raiuns dai schi“ é n proiet dles Regiuns alpines dl ARGE ALP che é gnü metü da jí sot ala direziun dla Provinzia de Trënt en colaboraziun cun la Provinzia de Balsan, la Regiun dla Lombardia, i Länder dl Tirol y dl Vorarlberg y dl Ciantun di Grijuns. Le obietif é sté chël da ciafé de bunes pratiches che reverda le sparagn d’energia pro l’adoranza de implanc dai schi, fontanes d’energia alternatives pro le funzionamënt di implanc sciöche ince formes de trasport alternatives ti raiuns da jí cui schi tl raiun dles Alpes.
„Öna dles chestiuns prinzipales sará tl dagní dantadöt chëra da ciafé na maiú armonia danter l’economia y l’ambiënt“, á sotligné l’assessur por la mobilité Florian Mussner tratan la presentaziun di 25 proiec (na pert bele realisá, na pert ciamó tla fasa de proietaziun). "N'ejëmpl dër positif vëgn dala furnadoia che porta da Suc sön la Munt de Suc y che vëgn anuzada da 1,4 miliuns de porsones al ann, cun la conseguënza che les emisciuns de andrinide carbonica é diminuides cotan", insciö l’assessur Mussner. Na forma de coliamënt sostenibla che podess ester d'ejëmpl por le dagní é - insciö l'assessur por la mobilité - le coliamënt cun la ferata danter Plan de Corones y Percha sciöche ince la forma alternativa de mobilité danter Moena y Soraga cun le Jouf de Ciareja. „N ejëmpl interessant é ince le lech artifizial de Corviglia a San Moritz“, á sotligné Mussner.
„Le concurs é partí sö te döes categories, da öna na pert él gnü valuté i proiec bele realisá, dal’atra pert él gnü fat n’analisa di proiec che é atualmënter tla fasa de planificaziun/realisaziun y che dess ester d’ejëmpl por la mobilité tles zones dai schi“, á recordé le diretur dl Ofize Furnadoies dla Provinzia Günther Pitscheider. „Di 25 proiec che é gnüs dac jö, nen n’él 8 dal Südtirol, 8 dala Provinzia de Trënt, trëi dal Tirol, da Vorarlberg y dal Ciantun di Grijiuns y insciö unse ince albü na rapresentanza dales Regiuns alpines plü importantes“, á splighé le coordinadú dl proiet Alessandro Conci (Provinzia de Trënt). I critérs de valutaziun di proiec é danter l'ater: (1) la presënza de poscibilités de sparagn d’energia pro l’adoranza de implanc dai schi, (2) la presënza de fontanes d’energia alternativa pro le funzionamënt di implanc y le trasport dles furnadoies sciöche (3) la presënza de formes de mobilité alternatives tles zones dai schi.
Pro la categoria che reverda i proiec en fasa de planificaziun y realisaziun á la comisciun premié la forma de mobilité alternativa danter Moena y Soraga cun le Jouf de Ciareja sciöche ince le Belvedere-Express, n coliamënt poscibl dal zënter de Campiglio cun le jú de Grosté, sciöche ince le lech artifizial por l’inevamënt tla zona dai schi de Corviglia tla Svizra.
Pro i proiec bele realisá é rové al pröm post dui proiec, le coliamënt cun la furnadoia danter Suc y Munt de Suc y le coliamënt cun les ferates dal Plan de Corones ala localité de Percha. Al terzo post s’ál tlassifiché la staziun intermodala dl coliamënt danter Folgarida y Marilleva tla Val di Sole tl Trentin.
Por plü informaziuns prëibel vijité la plata internet ofiziala: http://www.alpinski.provincia.tn.it/ .
Le file video po gní desciarié tlican sön:
Intervista assessur Mussner (ladin)rc
