Atualità
Geologia tles Dolomites: Premiaziun dla fondaz. UNESCO di proiec plü garatá
La fondaziun Dolomites UNESCO á premié incö (18 de má) a Balsan i davagnadus dles döes bandides sön la geologia: le concurs scientifich „Pest por le laur de dotorat Lorenz Keim“ y le concurs de idees „La geologia dles Dolomites – Stüde y proietaziun de n model geologich sön le teritore dles Dolomites“ ch reverda proiec de presentaziun y comunicaziun dles particolarités geologiches dles Dolomites.
La Fondaziun Dolomites UNESCO á presenté incö, lönesc ai 18 de má, i proiec che é rová al pröm post tl concurs scientifich „Pest por le laur de dotorat Lorenz Keim“ y tl concurs dles idees „La geologia dles Dolomites – stüde y proietaziun de n model geologich dl teritore dles Dolomites“. Les döes bandides de concurs é gnüdes publicades dan da n ann tl contest di laurs dla Rëi sön le patrimone geologich dla Fondaziun Dolomites UNESCO. „L’obietif di dui pesć é chël da valorisé i proiec de promoziun dl valur geologich dles Dolomites, aumentan insciö les conescënzes sön chësc tesur natural“, á dit l’assessur provinzial Richard Theiner, presidënt de turnus dla Fondaziun, tratan la conferënza stampa da incö, a chëra che al á ince tut pert le diretur dl Ofize Geologia Volkmar Mair y la direturia generala dla Fondaziun Marcella Morandini.
Le pest por le concurs d’idees „La geologia dles Dolomites“ ti é gnü assegné al proiet che é gnü valuté le plü original y efiziënt dal punt de odüda dla comunicaziun y dla valorisaziun dles particolarités geologiches dles Dolomites. Dui teams é rová al pröm post (cun na dotaziun de 2.500 euro porom): le grup de laur de Carla Bortolotti, Riccardo Giacomelli, Elena Magno (AlpStudio di Caldonazzo) á presenté le proiet "Taste the Dolomites - la geologia a portata di tutti" che trata dl’architetöra, dl paesaje y dla geologia cun l’obietif da ti presenté te na manira azessibla por düc les particolarités dla geologia y dla contrada dles Dolomites, y le team de Maddalena Aliprandi, Manuela Dasser, Alice Dellantonio cun le laur „De piceres publicaziuns sön les Dolomites“ cun n proiet dediché ai mituns dles scolines y che é partí sö te döes perts: öna na publicaziun reverda la storia dla geologia dles Dolomites y la secunda les particolarités di nü sistems che fej pert dl patrimone Dolomites UNESCO.
Le pest por le miú laur de dotorat (cun na dotaziun de 3mile euro) é dediché a Lorenz Keim, geologh dla Provinzia che á contribuí dër tröp cun sües inrescides scientifiches ala candidatöra dles Dolomites a Patrimone mondial dl UNESCO y che é mort massa abonora tl forá dl 2012. Le pröm post é gnü arjunt da Jacopo dal Corso cun so laur dal titul "The Middle - Late Triassic ∂13Cplant Trend And The Carnian Pluvial Event C-Isotope Signature". Dal Corso á stlüt jö le stüde de geologia y geologia tecnica tl 2007 tl Université da Padua y te süa inrescida al analisé i efec dles emisciuns de CO2 sön le tlima en referimënt ales mersces tl raiun dles Dolomites da plü de 230 miliuns de agn.
rc
Galaria dales fotografies
