Atualità
Dé internazional di Museums: 15mile vijitadus
La domënia ai 17 de má él gnü organisé por le 11ejimo iade le Dé internazional di Museums. 45 museums á fat para cun n program spezial y l’entrada debann. De plü é stades les propostes por i vijitadus, dai plü pici ai plü gragn cun n atenziun particolara chësc ann por i jogn. Dötadöm é la manifestaziun jüda dër bun cun 15.000 vijitadus.
![](/news/img/lazy.gif)
Tröc zitadins dl Südtirol, de plü ghesć co i ultims agn, y tröpes families cun mituns: ince chësc ann á la Repartiziun Museums dla Provinzia organisé le Dé internazional di Museums cun 45 strotöres museales che á daurí sües portes en domënia ai 17 de má por vijites y atraziuns particolares. N dat interessant: por gaujia dl bel tëmp á tröc vijitadus anuzé l’ocajiun por vijité museums dalunc dai zëntri sö por munt y de manco i museums tles cités.
Chësc ann é le moto dl dé sté„Museum. Dagní. Sozieté“ cun le focus sön le tëmp passé, mo ince sön domandes atuales y che se dá jö cun le dagní. Tröpes scomenciadies dl dé é stades ponsades por jogn y jones tl contest dl ann tematich „Young & Museum“, n proiet metü adöm dala Repartiziun Museums y dal'Assoziaziun Museums Südtirol. Le fin dl proiet é chël da motivé i jogn da se dé jö de plü cun i museums y tl medemo momënt ince da sensibilisé i museums sön i interesc dla jonëza. Insciö él gnü metü da jí en gaujiun dl 17 de má de plü scomenciadies ti museums, cun tröpes scomenciadies ponsades dantadöt por les jones y i jogn.
rc