Atualità
Bilanz dles assoziaziuns: trascmisciun online cun i sorvisc eGov
Cun incö, jöbia ai 21 de ma, pó dötes les assoziaziuns scrites ite ti registri provinziai dl Ofize Chestiuns de cabinet presenté online so bilanz y les relaziuns che reverda sües ativités fates tratan l’ann. Na sauridanza poscibla por merit di sorvisc dl’eGovernment adöm cun la cherta di sorvisc o le cunt digital dl zitadin.
„Por merit dla digitalisaziun de tröpes prozedöres burocratiches – sotlignëia l’assessuria Waltraud Deeg – podará i zitadins sparagné tröp tëmp y ressurses finanziares. Tl medemo tëmp aumentëia chësta sauridanza ince l’efiziënza dl’aministraziun publica. Vigni sorvisc che pó gní anuzé online é n vare inant tl vers de n aministraziun plü digitala, n proiet a chël che l’aministraziun provinziala ti stá do cun gran impëgn.“
Insciö podará da incö inant dötes les assoziaziuns scrites ite ti registri provinziai dl Ofize Chestiuns de cabinet presenté online sües relaziuns sön les ativités fates y sön so bilanz economich y patrimonial. La presentaziun pó gní fata tres le portal dl’eGovernment, ara é debann y la trascmisciun di dac vëgn garantida atira. Al basta avëi na Cherta di Sorvisc ativa o n account zertifiché dl cunt digital cun username y password.
rc
