Atualità
Dala Junta: Löm vërda ala lege omnibus sön l’economia
La Junta provinziala á aprové incö le dessëgn de lege omnibus sön l’economia. La proposta prevëiga na seria de intervënc d’adatamënt ales normatives europeiches y che porta para n smendrimënt dla burocrazia y la formulaziun nöia dl passaje legislatif che reverda la cuta sön le turism, por chëra che al vëgn lauré dötaurela adöm ales assoziaziuns competëntes por n model de finanziamënt alternatif.
La lege aproada de ma dl 2012 sön le finanziamënt dl turism prevëiga che la Junta sides obliada da presenté na cuta provinziala nöia sön le turism tl caje che i contribuc volontars dles organisaziuns turistiches ne ais nia arjunt la soma de 18 miliuns de euro. Cun la lege omnibus dess chësc passaje gní „alisiré“, cun na proposta aproada incö dala Junta provinziala che prevëiga che l’esecutif ais ma plü la poscibilité da introdüje la cuta söl turism y nia plü l’oblianza. „Al se trata de na modalité che nes consënt de jí inant cun les tratatives bele scomenciades cun les assoziaziuns competëntes – á sotligné incö le presidënt Kompatscher – por rové a n model alternatif de finanziamënt dl setur dl turism. La mësa de discusciun che trata chësta tematica é dër dlungia a n’acordanza.“
Implü él ince n secundo articul dla lege omnibus che reverda le turism, plü avisa les zones da parché por campers y roulettes che ne é nia daldöt zones de „camping“. Cina sëgn podô chëstes zones gní conscidrades sciöche na sort de „ares nia bën definides“, por chëres che al ne ê nia preodü controi y registraziuns y gnanca l’oblianza da paié la cuta de sojornanza comunala. Cun la lege nöia sará chëstes ezeziuns ma varëntes sce la sojornanza dorará demanco co trëi dis. Le dessëgn de lege omnibus sön l’economia, che gnará sëgn ejaminé dala comisciun legislativa competënta dl Consëi provinzial, prevëiga implü na seria de adatamënc ales diretives europeiches y n valgönes scomenciadies por n smendrimënt dla burocrazia.
N valgönes dles regoles nöies reverda le setur dla legislaziun sön le fonds dl export por chël che al ne gnará nia plü stabilí na soma fissa (cina sëgn êra de 5 miliuns), i mënacrëp che sará obliá da se registré ti ofizi provinziai competënc sciöche i maestri dai schi mëss bel fá atualmënter. Implü gnarál tut demez la consulta dles scores dai schi, al gnará alisiré les regoles por eserzité la profesciun di scoaciamins y i afitadus dles ciamenes messará s’adaté ala normativa europeica varënta te chësc setur y ne podará nia plü damané contribuc retroatifs por ci che reverda i investimënc.
rc
