Atualità

Scora / Cultura | 28.05.2015 | 14:08

Lege nöia sön la cultura: promoziun dla pluralité y dla partezipaziun

N aumënt di stromënc de finanziamënt, poscibilités de finanziamënc de plü agn y la diminuziun dla burocrazia: chisc é danter l’ater i obietifs dl dessëgn de lege nü sön la promoziun dla cultura, che é gnü aprové da püch dala Junta provinziala y presenté incö dai assessurs Christian Tommasini y Philipp Achammer. De plü ince les novités por la cultura ladina.

La basa por la lege provinziala atuala che reverda la promoziun dla cultura va zoruch al ann 1958, ajornada tl 1976, y che â insciö debojëgn da gní laurada fora danü cun n test organich che toles ite dötes les desposiziuns che é despartides atualmënter sön de plü leges provinziales. Le dessëgn de lege é gnü lauré fora dai assessurs Florian Mussner, Christian Tommasini y Philipp Achammer en colaboraziun cun les Repartiziuns culturales. „Un di obietifs prinzipai dl dessëgn de lege nü é le renforzamënt dl dërt de espresciun y partezipaziun culturala tla provinzia“, á sotligné incö, jöbia ai 28 de ma, l’assessur por la cultura taliana Christian Tommasini che á presenté le dessëgn de lege nü adöm al assessur Philipp Achammer. L’assessur por la cultura todëscia á recordé i fins prinzipai dla proposta de lege nöia che é danter l’ater „l’ampliamënt dl numer di stromënc por fá domanda, la poscibilité de finanziamënc por proiec y ativités de plü agn, la segurëza tla planificaziun y l’ampliamënt di seturs culturai por ti dé la poscibilité a plü ënc y assoziaziuns da fá domanda“, insciö Achammer.

Por ci che reverda le grup linguistich ladin él ince de plü novités interessantes: „Da öna na pert él preodü n renforzamënt dl grup linguistich ladin tla consulta culturala generala che sará plü ampla cun rapresentanc de düc trëi i grups linguistics. Chësta consulta ará l’inciaria importanta da aconsié la Junta provinziala sön l’orientamënt dla politica culturala dl Südtirol, dantadöt por ci che reverda proiec deboriada de düc i zitadins dla provinzia“, á sotligné Alexander Piccolruaz, colaboradú dla Repartiziun Cultura ladina dla Provinzia, che á dé na valutaziun tecnica dl’orientamënt dla lege nöia en rapresentanza dl assessur ladin Florian Mussner. Tres la lege atuala é la Consulta culturala deboriada formada dai trëi assessurs competënc plü dui rapresentanc dla Repatiziun Cultura todëscia y un n rapresentant dla Repartiziun Cultura taliana.

Por garantí i debojëgns desvalies di grups linguistics romagnel en forza ince les trëi consultes spezifiches, che ará le compit, sciöche cina sëgn, da aconsié i assessurs y les Repartiziuns culturales dla Provinzia pro le finanziamënt dles lies, di proiec y dles ativités culturales. L’assessur por la cultura taliana Christian Tommasini á sotligné l’importanza de n renforzamënt dla colaboraziun danter i trëi grups linguistics: „Öna dles fondamëntes dla lege nöia é propi na maiú colaboraziun tl setur dla cultura dl Südtirol che dess jí a bëgn de düc i zitadins dl Südtirol.“ N fautur important é ince te chësc vers le smendrimënt dla burocrazia, insciö Tommasini.

„N ater punt relevant por le grup linguistich ladin reverda les poscibilités de finanziamënt de ciases edituries y de imprejes che prodüj films y che podess gní stimolades dai finanziamënc da realisé produziuns che tol ite ince le lingaz y la cultura ladina“, á sotligné Piccolruaz. Al ne se trata chiló nia de na promoziun dl film por motifs de davagn, sciöche preodü dla BLS, mo dla produziun de films y contignüs mediai che dess porté pro a n arichimënt cultural.

Do la pröma aprovaziun da pert dla Junta jará sëgn la proposta de lege inant al Consëi provinzial. Tl medemo tëmp él preodü de plü sëres de discusciun, ai 29 de ma a Balsan y al 1 de jügn a Maran, olache an tratará i aspec desvalies dla proposta de lege.  Plü informaziuns pon ciafé tres la Repartiziun Cultura ladina: http://www.provincia.bz.it/intendenza-ladina/default.asp o ince sot a:  http://www.provinz.bz.it/land/landesregierung/kultur-perspektiven.asp

rc

Galaria dales fotografies