Atualità
Sëra de film y leteratöra tla Biblioteca provinziala Teßmann ai 5 de jügn
Dui films di auturs Hans Albala (Viena) y Bruno Jori (Maran) gnará mostrá en vëndres, ai 5 de jügn dales 20.00 tla Biblioteca Teßmann da Balsan. La moderaziun y presentaziun dla sëra sará tles mans di auturs Ada Zapperi Zucker y da Martin Hanni. La forza dl'ega y dla natöra sará döes dles tematiches prinzipales dla manifestaziun.
La scrituria Ada Zapperi Zucker che vëgn dala Sicilia y vir a Minca (München) y tl Südtirol liará fora de so volum de stories „Ein Tag in Bozen / Un giorno a Bolzano“ che contëgn ince na biografia dl autur de films austriach Hans Albala (1919-1976). Dl 1938 ê Albala gnü stlüt fora dala scora deach'al ê n "mez iüda" y spo deporté te ciamps de laur desvalis dl nazionalsozialism. Do la vera ti él jü do al laur da jornalist lëde, plü tert dêl dant da ester n "grafich da film". Hans Albala é gnü conesciü tres sü films de retlam olache al metô adöm tres indô musiga y ritm cun figöres d'animaziun y porsones reales.
Tratan la sëra de film gnarál mostré le film "Symphonie in E" (1967). Hans Albala â davagné inlaota n concurs scrit fora dal conzern de produziun de forza eletrica (Österreichische Elektrizitätswirtschaft-AG). Le film documentëia te na manira demorvëia la produziun de forza eletrica dala forza dl'ega pro la sinfonia „Aus der neuen Welt“ de Antonín Dvořák.
Martin Hanni, publizist, organisadú de mostres, redadú televisif y autur de films da Eppan baia de Bruno Jori (1922-1970), autur de films da Maran che á vit y lauré feter tl medemo tëmp sciöche Albala. Bruno Jori á scomencé da fá films ti pröms agn do la vera: films cörc, plü tert ince documentars y films de retlam.
Tratan la sëra de film gnarál mostré le film „Die Etsch – La vita sul fiume“ (1954). Ince te chësc film él l'ega che á la pert prinzipala. Le film é na documentaziun dla natöra y dla vita dlungia l'Adesc, da olache al nasc tla Val Venosta cina che al va ite tl Mer Adriatich.
I films “Symphonie in E” de Hans Albala y “Die Etsch – La vita sul fiume“ de Bruno Iori gnará mostrá en vëndres, ai 5 de jügn, dales 20.00 tla Biblioteca provinziala Dr. Friedrich Teßmann a Balsan.
Chësta scomenciadia é na manifestaziun dla Biblioteca provinziala Dr. Friedrich Teßmann en colaboraziun cun l'Ofize Media audiovisuai dla Provinzia autonoma de Balsan - Südtirol. La Biblioteca Provinziala Dr. Friedrich Teßmann á süa sënta tla strada Armando Diaz 8 a Balsan, Telefon 0471 471814, E-Mail info@tessmann.it; http://www.tessmann.it/
rc
