Atualità
Bilanz CiasaClima: 11mile zertificaziuns, dagní cun manco burocrazia
Zirca 11mile frabicac zertificá dal scomenciamënt dl proiet CiasaClima, de chisc söporjö 1.400 ma l’ann passé, na fondamënta sigüda cun n volum d’afars che crësc y n dagní cun manco prozedöres burocratiches. Chisc é i punc plü importanc dl bilanz dl’Agenzia CiasaClima presentá incö (ai 4 de jügn) dal assessur Richard Theiner.
„Le proiet dla CiasaClima – insciö á splighé l’assessur por l’ambiënt Richard Theiner – é n sistem de cualité che s’á desmostré d’ütl nia ma tl Südtirol, mo te döta la Talia, y le raport danter Balsan y Roma é tres plü caraterisé da n’adoranza a livel nazional dles sperimentaziuns garatades a livel local. Te chësc contest podess le proiet dla CiasaClima ester n ejëmpl interessant por döt le setur dl’energia y dl’edilizia tla Talia.“ Por ci che reverda la CiasaClima tl Südtirol é sté le mudamënt plü important dl 2014 le passaje dl’Agenzia CiasaClima da na sozieté „inhouse“ a n ënt dla Provinzia, cun na denomiaziun nöia de Agenzia por l’energia Südtirol CiasaClima. „Chësc mudamënt – á splighé le diretur Ulrich Santa – é la fondamënta por che l’Agenzia ciafes les competënzes nezesciares por arjunje i obietifs preodüs dal pachet clima 2050. Ti proscims 35 agn dessel insciö gní smendrí les emisciuns anuales de anidride carbonica de 1,5 tonelades y la potënza tresfora anuala de 2.200 chilowatt por porsona. I pröms vari te chësc vers é bele gnüs fac, por ejëmpl tres le svilup dl program ComunClima.“
Le laur prinzipal dl’Agenzia sará ince tl dagní la zertificaziun energetica. Ince tla perioda dla crisa él gnü aumenté ti ultims agn le numer di frabicac zertificá (tl 2014 é la cumpëda de 1.400 frabica nüs y ressanamënc), cun na chersciüda dantadöt da fora dla Provinzia. „Cun le zertificat de cualité CiasaClima School – á sotligné inant le presidënt Stefan Fattor – sun stá bugn da amplié le numer di protocols de proteziun ambientala. Implü él jü en forza l’ann passé la diretiva provinziala che atuëia les normatives europeiches sön l’efiziënza energetica, n setur che prevëiga atri vari inant tl dagní. Dal 1 de messé inant gnarál insciö tut demez n valgönes prozedöres burocratiches y podará gní efetué completamënter te na forma digitala.“
rc
