Atualità
Valgügn aconsiadus dl Consëi provinzial á vijité les strotöres d’acoliënza
482 porsones che á fat domanda do asil sojornëia atualmënter tles sis strotöres por i migranc tl Südtirol. Sön invit dl’assessuria por le sozial Martha Stocker á vijité sis aconsiadus dl Consëi provinzial incö, lönesc ai 8 de jügn, n valgönes dles strotöres d’acoliënza a Balsan y Maran por se fá n'idea generala dla situaziun atuala di migranc tl Südtirol.
Tl contest de na vijita ti zëntri d’acoliënza y de pröm aiüt tla ex-caserma Gorio sciöche ince tla Ciasa Aron/Schwefelbad a Balsan y tla ciasa Arnika a Maran s’á na pert di aconsiadus provinziai informé incö (08 de jügn) sön la situaziun atuala di migranc che damana asil tl Südtirol y che é en viaje por le Nord dl’Europa. Le presidënt dla Provinzia Arno Kompatscher á ince tut pert ala vijita dla ciasa Gorio, le vize-presidënt Christian Tommasini tratan la vijita ala ex-caserma Gorio. „Les 482 porsones che á fat domanda do asil tl Südtirol sojornëia atualmënter te sis strotöres – cinch a Balsan y öna a Maran“, á splighé incö l’assessuria Martha Stocker tratan la vijita. Les strotöres vëgn gestides dala Caritas y dal’assoziaziun Volontarius. „Deache al é preodü che ti proscims mëisc restará le numer di migranc che röia adalerch le medemo y che tröpes porsones porvará inant da arjunje l’Europa messará le numer dles strotöres d’acoliënza plüssigü gní amplié“, insciö Stocker. Insciö él bele preodü na strotöra ajuntiva a Wiesen/Pfitsch tl’Alta Val d’Isarch, atres strotöre é en previjiun te düc i raiuns dla Provinzia, insciö Stocker.
L’acoliënza di migranc tl Südtirol mët man en general cun na pröma vijita tla ex-caserma Gorio a Balsan, olache al vëgn fat na vijita sanitara y metü da jí les prömes prozedöres aministratives por spartí sö i migranc tles strotöres d’acoliënza. „Sciöche valur mesan é la dorada dla perioda de permanënza te chëstes strotöres dai 12 ai 18 mëisc o cina un n mëis do la contlujiun dla domanda do asil“, á splighé le diretur dla Repartiziun Politiches soziales Luca Critelli ai aconsiadus provinziai. L’ejaminaziun de na domanda d’asil dess doré mesamënter dai trëi ai sis mëisc, tla realité döra indere n'ejaminaziun dai 8 ai 10 mëisc. Do la lege nazionala pó na porsona che á fat domanda do asil tó sö n laur do sis mëisc de speta, mo ciafé n laur é dër ri dantadöt por les püces conescënzes di lingac y por la condiziun iuridica malsigüda. Les organisaziuns che se crüzia di migranc ne se fistidëia insciö nia ma di contac locai por ciafé laur, mo ince dl’organisaziun di cursc de lingac y dla conescënza dla cultura y dles formes de convivënza tl Südtirol.
Da pert di aconsiadus provinziai él gnü fat domandes sön la prozedöra d’asil y dles formes de sostëgn tratan le tëmp de speta. Al é gnü sotrissé l’importanza da aumenté i sforc por ci che reverda l’integraziun y l’ocupaziun di migranc.
rc
Galaria dales fotografies
Imaja: USP/Daniel Rabanser
Imaja: USP/ohn
