Atualità
Dala Junta: i dac sön le laur confermëia che la strada é chëra dërta
Le presidënt Kompatscher tól at cun sodesfaziun dl svilup positif dl'ocupaziun y che é gnü confermé dai dac dl raport sön le marcé dl laur presenté inier. „Les statistiches nes confermëia che le svilup dl marcé dl laur südtirolej é positif y chësc é ince mirit dles mosöres atuades dal govern provinzial cun la creaziun de posć de laur nüs y la diminuziun dla presciun fiscala por le imprejes.“
L’ocupaziun é en aumënt dl 0,8 porcënt tl Südtirol y por le pröm iade da tröp tëmp se möi le trend dla dejocupaziun tl vers de n arbassamënt (la porcentuala é dl 4,6 %) – chësc svilup porta para n clima de otimism danter i lauranc, les imprejes y i consumadus. Sön la basa de chëstes conscideraziuns che se basëia sön raporc, statistiches y inrescides sotlignëia le presidënt dla Provinzia süa contentëza por i vari inant fac ti ultims mëisc amesa na situaziun dl’economia locala y internazionala complicada. „Bel plan se fejel sintí ince da nos le svilup positif dl marce dl laur europeich sciöche ince les mosöres atuades dal govern nazional, por ejëmpl tres le Jobs Act, che á albü y á dötaurela efec positifs ince te nosc teritore“, insciö Kompatscher.
Tla Talia él gnü registré danter i mëisc de jena y auri n aumënt de 23 porcënt dl numer di contrac de laur a tëmp indeterminé, tl Südtirol é chësc dat cinamai le dopl tan alt (46%). „Chësc ó dí che i sun stá bugn da superé la crisa te na manira otimala, cun na chersciüda economica costanta. I sun sigü che te chësc contest á les mosöres dla Junta provinziala albü n'influënza positiva y che ares á daidé da mioré la competitivité de nostes aziëndes, cun conseguënzes ince tl monn dl laur.“
Un di obietifs prinzipai dl program de legislatöra reverda propi la creaziun de posć de laur nüs cun la metüda en sigurté di posć bele desponibls. „Te chësc pröm ann y mez de govern – á sotligné inant le presidënt dla Provinzia - únse bele fat tröp por ci che reverda i alisiramënc dles cutes: por ejëmpl tres la Cuta comunala imobiliara (IMI), che ti garantësc ales families y ales imprejes condiziuns plü bunes co tl rest dla Talia, mo ince tres l’IRPEF, olache l’alicuota é gnüda arbassada ciamó dl 2,68%, zënza ne se desmentié nia la „no-tax-area“ sot ai 20mile euro por ci che reverda l’ajunta dl IRPEF.“
“Dötadöm – á stlüt jö le presidënt Kompatscher – él gnü conzedü na soma de 210 miliuns de euro de alisiraziuns fiscales, le mez de chëstes a bëgn dles imprejes: i sun sigü che i sun sön la dërta strada, sciöche i dac plü atuai dles inrescides sön le marcé dl laur nes confermëia.“
rc
