Atualità
Trasport publich local: dai 21 de jügn orars nüs por les corieres
Cun la fin dl ann scolastich vëgnel ince ajorné i orars di mesi dl trasport publich. Por podëi ti jí adincuntra a na presënza plü grana de passajiers sön les trates che porta a traverc de escurjiuns gnarál aumenté dai 21 de jügn i mesi de trasport publich tratan les ores de aorela cörta y ti fins dl’edema. De plü é ince les novités por les valades ladines.
Da en domënia, ai 21 de jügn dl 2015 mudará l’orar dles corieres dl trasport publich che s’adatará ince ales esigënzes dles sajuns da d’isté y da d’altonn. Les mudaziuns plü importantes a livel provinzial é danter l’ater: la linia express nöia danter Eppan (Tetterplatz) y Balsan che passará vigni ora, n valgönes mudaziuns dles linies dl Citybus tl Unterland y pro la linia 273 da Mals-Prad-Sulden sön le Ju dl Stelvio, Implü gnarál despartí i coliamënc danter Sterzing-Ridnaun y Sterzing-Ratschings. De plü é ince les mudaziuns dles linies dla SASA de Balsan y Maran.
„Öna dles nostes priorités tratan i mëisc da d’isté é le potenziamënt di coliamënc cun traverc de escursciuns, mo al é ince bele gnü lauré sön l’otimisaziun di coliamënc por le scomenciamënt dl ann de scora da d’altonn“, spliga l’assessur por la mobilité Florian Mussner. „I fajun le poscibl por ti gní adincuntra ales ghiranzes di comuns, dles assoziaziuns turistiches, dles scores y di grups d’interes, tolon tres en conscidraziun les ressurses desponibles, la relaziun di cosć cun i vantaji y les poscibilités tecniches“, insciö Mussner.
Les mudaziuns plü importantes tles valades ladines
Plü sovënz jará tratan la perioda da d’isté dai 21 de jügn inant dantadöt les linies dles corieres sön les trates che porta a traverc de escursciuns, insciö sarà indô atives dai 21 de jügn inant les linies da d’isté te Gherdëna cun la linia 355 che va da Bula ćina Urtijëi y Sacun, la linia da d’isté 356 che zircolëia tl Comun de Urtijëi y la linia estiva 357 danter Sëlva – Col Raiser - Santa Crestina. Plü gonot passa les corieres ince tratan döt l'isté (intlusivamënter fins dl'edema y dis de festa) sön la trata 350 che coliëia Balsan/Porsenù cun Gherdëna. La linia 351 portará i anuzadus dl trasport publich da Urtijëi a Laion cina Tlüses y Porsenú (y ince derevers).
Cun orars nüs piará ince ia ai 21 de jügn la linia 460 dala Val Badia a Bornech, la linia 461“Al Plan Mareobus“ y la linia 462 che coliëia Pederü cun Al Plan y Longega (cun ince Bornech). Tl Comun de Mareo podarán s’anuzé tratan l’isté dla linia 463 da Al Plan ćina sön Ju de Furćia, dai 21 de jügn sarál implü indô en funziun le orar estif dla linia 464 che coliëia le zënter dl paisc de La Val cun San Martin, Lungiarü, Antermëia cina sön Börz. Tl’Alta Badia fajará la linia 465, passan vigni ora, dai 21 de jügn inant la trata Corvara – La Ila – San Ciascian cina söl Ju de Falzares y jö Cortina (pian ia dui iadi ince da Calfosch). La "linia 471 Jus dolomitics" sarà ativa tratan döt l’isté y coliëia danter l'ater cun orars y trates desvalies Runcadić - Urtijëi – St. Crestina – Sëlva – Ju de Sela - Ju de Pordoi - Ju de Frara – Calfosch - Corvara - Reba - Cianacëi. Dötes les trates podará naturalmënter gní fates te trames döes les direziuns. Plü informaziuns sön döt le trasport publich local y i orars nüs da d’isté tres la plata internet: http://www.suedtirolmubilta.info/. An pó ince s’informé adoran l'app SüdtirolToGo.
rc
