Atualità
1,9 miliuns por la familia y le laur dal fonds di aconsiadus regionai
Le fonds metü sö cun la retüda de na pert dles ponsiuns di ex aconsiadus regionai portará pro a sostigní sides les families che le laur. La junta provinziala á aprové inier (ai 9 de jügn) na seria de proiec, che ti messará sëgn gní sotmetüs ala Regiun, por indöt 1,9 miliuns de euro: al salta al edl le contribut por l’aspetativa di peri.
I proiec aprová, che gnará finanziá dal fonds cherié cun la retüda de na pert dles ponsiuns di ex aconsiadus regionai, vëgn partis sö al 50% danter i Departimënc provinziai coordiná dales assessuries Martha Stocker y Waltraud Deeg, y reverda le sostëgn dl laur y dles families. Pian ia dala pert liada al laur, ón finanzié cun i mesi dl fonds regional proiec dles cooperatives soziales che é bones da cherié posc de laur por porsones desvantajades, mo nia ma: al sará ince lerch por daidé les porsones cun handicap y les porsones zënza laur over 50 da ciafé n laur; te tramidui i caji adoran sciöche daturs de laur ënc publics sciöche la Provinzia, i Comuns y les Comunités raionales. “Al é spo scomenciadies importantes d’acompagnamënt dles ëres vitimes de violënza te ciasa – á ajunté l’assessuria Martha Stocker – y de sostëgn al’orientamënt profescional por che al ne vëgnes nia lascé da jí a scora”.
Por ci che reverda la pert liada ala familia, gnará i mesi finanziars a desposiziun adorá por mioré l’oferta dles ativités d’isté y domisdé, tignin dantadöt cunt di mituns y di jogn cun handicap. Le proiet plü important sará, por mirit de passa 700mila euro, n proiet por sostigní l’aspetativa di peri. “L’impat economich sön la familia sce le pere ne laora nia – sotrissëia l’assessuria Waltraud Deeg – é feter dagnora majera co sce la uma ne laora nia. Chësc é ince öna dles rajuns ciudì che tröc ëi tol la dezijiun da renunzié a n tëmp d’aspetativa por sté pro i mituns, y nos porvarun da porté pro a mudé chësta situaziun cun n contribut economich ad hoc”. En concret, i peri che damanará da sté a ciasa ti pröm 18 mëisc de vita dl möt, ciafará n contribut de 400 euro al mëis por alplü trëi mëisc, sce le genitur á le dërt al 30% dl paiamënt; chësta soma gnará radoplada sce al ne ciafa nia. I proiec, aprová incö dala junta provinziala, ti gnará ortiá ala Regiun por l’aprovaziun definitiva.
usp
