Atualità
Dolomites UNESCO, workshop sön la gestiun dl teritore y dl turism
Al á inom #DOLOMITI2040 y al é n percurs de debatüdes por se confronté sön le svilup dla gestiun dl teritore dles Dolomites patrimone UNESCO y sön la strategia de n turism sostenibl. Le pröm workshop é gnü tigní chisc dis a Badia, la proscima incuntada sará indoman ai 12 de jügn a Welschnofen/Nova Levante.
Tres na condüta de moderadus vëgn i partezipanc partis sö tratan le workshop te grups de debatüda desvalis olache ai presentëia sües idees por ci che reverda le svilup dl teritore dles Dolomites patrimone UNESCO en acordanza cun n conzet de turism sostenibl. La metoda de discusciun é chëra di „World Cafès“ y les tematiches debatüdes é de plü: dal turism ala mobilité, dala sconanza dl paesaje al svilup dl’economia locala, dala cultura ales politiches por i jogn, zënza ne se desmentié nia dl pericul dl spopolamënt di raiuns da munt. Les incuntades #DOLOMITI2040 á sciöche fin chël de contribuí da ciafé n conzet ampl de gestiun dl bëgn dla natöra y dla contrada dles Dolomites por podëi ti presenté na strategia de proteziun dl teritore ai ispeturs UNESCO che gnará a ejaminé les Dolomites tratan l'ann 2016.
„La sfidada prinzipala – á comenté le diretur dl Ofize Parcs naturai Renato Sascor – é chëra da planifiché adöm i proscims vari de proteziun dl raiun dles Dolomites cina l’ann 2040.“ Do che ál é gnü a se le dé n’incuntada a Badia dan da püch, sará la proscima incuntada cun i workshops dla Fondaziun Dolomites UNESCO indoman,
vëndres ai 12 de jügn
dales 17.00 ales 20.00
tl salf dles incuntades
a via Roma 27
a Welschnofen/Nova Levante.
Al’incuntada tolarál ince pert l’assessur por l’ambiënt Richard Theiner, plü informaziuns é da ciafé sot a: www.dolomitiunesco.it.
rc
