Atualità
Internet asvelt, Deeg incunta la Ministra Guidi: „Tlé por le svilup“
Les strategies por l’ampliamënt dla banda leria y dl coliamënt internet asvelt é stades les tematiches prinzipales dl’incuntada da incö (11 de jügn) a Roma danter l’assessuria Waltraud Deeg y la Ministra por le svilup economich Federica Guidi. „La banda lëria é n’infrastrotöra fondamentala por la chersciüda dl teritore“, á sotligné Deeg.
I obietifs prinzipai dl’agenda digitala 2020 prevëiga che cina le 2020 dess l’85 porcënt dla popolaziun dla Talia avëi n azes a coliamënc cun almanco 100 Mbit/s. „Al se trata de n travert dër important – á splighé l’assessuria Waltraud Deeg – dantadöt por n teritore da munt y cun püc abitanc sciöche chël dl Südtirol.“ Tratan l’incuntada cun la Ministra Federica Guidi, a chëra che al á ince tut pert le parlamentar Daniel Alfreider, á l’assessuria por l’informatica splighé les sfidades y problematiches prinzipales che la defujiun dla fira otica porta cun se sura döt le teritore dla Provinzia de Balsan. „Te vigni caje se tratel de n’infraströra zënza chëra che i ne podun nia fá demanco: i coliamënc asvelc é la tle por le svilup economich, por la competitivité de nosc raiun da munt y por le svilup dl model de partezipaziun ala vita politica.“
Por ci che reverda le Südtirol á i ofizi competënc lauré ti ultims mëisc al’elaboraziun de n proiet strategich por podëi garantí la banda leria sön döt le teritore südtirolej, y dal’atra pert por respeté les ghiranzes a livel nazional. „Nosta strategia é chëra da colié les infrastrotöres energetiches cun chëres dl internet asvelt por podëi realisé te na dorada concreta le completamënt de na rëi telematica efiziënta y sostenibla dal punt de odüda finanziar.“
Danter i passaji tlé él da ciafé danter l’ater les mosöres de sostëgn a bëgn dles imprejes y dles families por ci che reverda la fira otica, na chestiun che é ince gnüda debatüda cun la Ministra Guidi. „Atualmënter vëgnel arjigné ca n decret che rovará tosc tl Consëi di Ministri – á prezisé le parlamanetar Alfreider – y i ciarun che al vëgnes ince tut en conscidraziun les esigënzes de nosc teritore. Al é preodü de plü incuntades tecniches, tres chëres che i porvarun da ciafé na soluziun concreta tl tëmp plü asvelt che ara vá.“ I pröms vari tl proiet dla fira otica sará al zënter de n’incuntada danter l’assessuria Deeg y le presidënt Kompatscher indoman (vëndres ai 12 de jügn) adöm ai ombolc y gnará presentá te na conferënza stampa ai 18 de lugio.
rc
