Atualità
Jogn y jones debann te 60 museums cun l’abo+
Tratan les vacanzes scolastiches da d’isté podará i jogn y les jones che á n Südtirol Pass abo+ vijité debann plü co 60 museums dla provinzia. La scomenciadia fej pert dl ann tematich „Young & Museum“ y é n proiet de colaboraziun danter la Repartiziun Museums y la Repartiziun Mobilité dla Provinzia.
Ciamó degönes idees concretes por les vacanzes da d’isté? Ciudi pa ne jí nia ala scoverta di museums dla Provinzia debann y s’anuzan dles ferates y dles corieres zënza ne messëi gnanca paié le iade? Chësta proposta ti vëgn sëgn fata a düc i jogn y jones cina ai 27 agn che vir tla Provinzia de Balsan y che podará anuzé dai 17 de jügn cina ai 6 de setëmber dl 2015 de so Südtirol Abo+ sciöche cherta d’ingres debann te 60 museums, coleziuns y posć d’esposiziun dl Südtirol.
Al basta mostré so l'Abo+ ala cassa dl museums por podëi vijité la strotöra y por fá de nöies esperiënzes. „Al me fajess dër plajëi sce chësta ocajiun gniss anuzada cotan dai jogn y dales jones dl Südtirol“, comentëia l’assessur por i museums y por la mobilité Florian Mussner. Tla fasa de realisaziun él ince na cherta cun düc i museums che tol pert al proiet y cun les trates plü comotes dl trasport publich. Chëstes chertes sará da ciafé tles staziuns dles ferates, ti zëntri di jogn, tles biblioteches y ince ti museums. Informaziuns plü monüdes pon ciafé sot a www.musei-altoadige.it/youngmuseum.
rc
