Atualità
Dala junta: plan provinzial por la prevenziun cina la fin dl 2015
La junta provinziala á metü incö (16 de jügn) les fondamëntes por lauré fora n plan provinzial por la prevenziun. “Sconé la sanité di zitadins tres na ativité de prevenziun che cür döt – á sotrissé l’assessuria Martha Stocker – rapresentëia un di pilastri dla reforma sanitara y á porchël la priorité”.
La prevenziun cuntra i inzidënc, dötes les mosöres por smendrí le prigo de dependënzes y maraties che an se taca, sciöche ince por sostigní la sanité mentala, n stil de vita y alimentaziun plü sann y n mënder impat dl incuinamënt ambiental: chisc é ma n valgügn di obietifs dl plan nazional por la prevenziun aprové dal Stat talian por le tëmp 2014-2018. Cun la deliberaziun aprovada incö (16 de jügn) dala junta provinziala, vëgnel metü les fondamëntes y al vëgn fat i pröms vari por lauré fora n te stromënt cina la fin dl ann ince a livel provinzial.
“Ara nen vá nia ma da ativé programs y scomenciadies – á dit Martha Stocker – mo ince da coordiné proiec y porsones che laora ti seturs plü desvalis.” Al se trata de na inciaria zitia, che ti é gnüda surandada ala primara dl Sorvisc de igiena y sanité publica dl’Aziënda sanitara dl Südtirol, Dagmar Regele. A ëra ti spetel da lauré fora le plan provinzial por la prevenziun lauran cun düc i partners dl setur y, dantadöt, cun l’Ofize provinzial Sport y promoziun dla sanité, sciöche ince cun l’Ofize provinzial Igiena y sanité publica. La pröma proposta dl plan messará gní laurada fora por d’altonn. La junta messará aprové le test definitivamënter cina ai 31 de dezëmber dl 2015.
usp
