Atualità
Dala Junta: aeroport, strategia cina d'otober y spo referendum
Löm vërda por le ressanamënt dla pista por arsí y pié ia da Balsan, mo degun ampliamënt, cina d’otober presentaziun tl Consëi de na lege cun na strategia nöia y spo organisaziun de n referendum popolar. Chësc é le percurs presenté incö (16 de jügn) dal presidënt dla Provinzia Arno Kompatscher por ci che reverda le dagní dl aeroport da Balsan.
La pröma chestiun prezisada incö (mertesc ai 16 de jügn) dal presidënt Kompatscher reverda l’ampliamënt dl aeroport da Balsan, y la resposta ales domandes de n ampliamënt poscibl é dër tlera. „La priorité atuala é i laurs de ressanamënt che ne tol nia ite n ampliamënt dla pista por arsí y pié ia mo ma i adatamënc nezesciars ai standarg dla tecnica y dla sigurté“, á splighé incö le presidënt dla Provinzia. La spëisa por i cosć de chëstes operaziuns de ressanamënt é de 5,4 miliuns de euro, i laurs gnará fac sëgn tla perioda zënza jori de linia danter Balsan y Roma dai 18 de jügn inant por porté a piz i laurs te na dorada de tëmpl plü cörta poscibla.
„La Junta – á ajunté le presidënt Kompatscher – se tëgn ai punc che reverda le svilup dl aeroport anunziá tl program dl govern. Cina le mëis d’otober ti gnarál presenté al Consëi provinzial n dessëgn de lege cun n proiet tler por le svilup dl aeroport da Balsan por ti pormët ai zitadins dl Südtirol da dé jö süa minunga sot forma de n referendum poplar.“ Kompatscher á sotligné inant che „atualmënter vëgnel porté inant de plü tratatives cun compagnies di joliers che valutëia les poscibilités de anuzamënt dl aeroport da Balsan“, y á recordé che ma le 17 porcënt di 12mile movimënc tl aeroport de Balsan reverda la trata de linia danter Balsan y Roma gestida dala Darwin.
Ince sce la compagnia dla Darwin ne sará nia plü presënta cun la trata Roma – Balsan dai 18 de jügn inant, ne ará chësc degönes conseguënzes sön les atres ativités, dantadöt por ci che reverda i jori da d’isté che coliëia Balsan cun Cagliari, Olbia, Lamezia Terme y Catania. „Un di traverc dla Junta provinziala é chël da aumenté l’atrativité dl aeroport da Balsan, n passaje che nes damana na seria d’adatamënc dl’organisaziun y dles infrastrotöres“, á prezisé Kompatscher. N valgügn de chisc laurs podará sëgn gní fac sëgn d’isté y che reverda laurs de renovamënt di canai por le drenaje dl’ega sön la pista, de renovamënt dl asfalt (deache le asfalt atual ne arjunj nia i valurs de sferiada tratan dötes les situaziuns climatiches) y laurs de amarsciamënt cun corusc che iluminëia la pista.
rc
