Atualità
Cooperaziun al svilup, proiec por aiüc tles Filipines
La fondaturia dl Panay Fair Trade Center, Ruth FE Salditos, partner da plü agn dla cooperaziun al svilup dla Provinzia de Balsan, é stada chisc dis tl Südtirol. Incö (17 de jügn) ára incunté la direturia dl Ofize Chestiuns de cabinet Elisabeth Spergser por ti mostré n proiet che vëgn dötaurela realisé tles Filipines.
Le Panay Fair Trade Center porta inant plü ativités de cooperaziun al svilup sön de plü isoles dles Filipines. Dal 1991 inant á la sozieté metü da jí na colaboraziun cun la Provinzia de Balsan por proiec de sostëgn de cooperatives y produturs de zücher de ciana y de banana chips, produc che an ciafa te tröpes botëghes tl Südtirol y tles Boteghës dl monn südtirolejes. „Le Panay Fair Trade Center – spliga Ruth Fe Salditos – laora da passa vint agn por la sconanza y promoziun di dërc di pici produturs y lauranc, por prisc plü iüsć y por n svilup sostenibl.“ Tratan l’ann 2015 á l’organisaziun „CTM altromercato“ y le PFTC (Panay Fair Trade Center) presenté ala Provinzia n proiet por l’ampliamënt y la restrotoraziun dl zënter de produziun al’intern de chël che al laora sura 400 paurs.
Tratan l’incuntada él gnü rajoné ince dl svilup positif de n proiet tl setur dl pröm aiüt che reverda la formaziun de 200 volontars tla zona de Iloilo tles Filipines por la promoziun dl dërt comportamënt te caji de desgrazies naturales. „Le proiet é gnü finanzié cun n import de 11mile euro – á sotligné Elisabeth Spergser, direturia dl Ofize Chestiuns de cabinet – y nes á pormetü da manajé te na manira efiziënta na pert dles operaziuns de pröm aiüt y d'informaziun dla popolaziun püch do la desgrazia dl taifun Haiyan che á arjunt les Filipines tl 2013.“
Tla perioda de permanënza tla Talia y tl’Austria presentëia Ruth Salditos so laur d’informaziun sön la situaziun tles Filipines al’opiniun publica, damanan n’atenziun y presciun particolara sön le govern che violëia dötaurela i dërc umans te so paisc, insciö Salditos. La fondaturia de Panay Fair Trade Center tolará ince pert a na sëra d’informaziun ala Botëga dl Monn insnöt dales 20.30 tl salf Oberrauch, Corso Libertà 35 a Balsan olache ará cuntará de so impëgn por la promoziun di dërc soziai y umans. Ala incuntada da incö danmisdé ál ince tut pert Chiara Rabini dla cooperaziun al svilup dla Provinzia de Balsan, Ruth Dalvai dl „CTM altromercato“ y la coordinadëssa dles Botëghes dl Monn Brigitte Gritsch.
rc
Galaria dales fotografies
Foto USP
