Atualità

Politica | 18.06.2015 | 17:15

Autonomia, comisciun paritetica por la reforma dl Statut

L’istituziun de na comisciun paritetica che laurará ala creaziun de n test de reforma dl Statut d’autonomia. Chësc é le resultat dl’incuntada da incö (18 de jügn) a Roma danter i presidënc dles Regiuns y Provinzies cun n statut spezial, danter chisc ince Arno Kompatscher, cun le Secreter de Stat por i afars regionai Gianclaudio Bressa.

Al’incuntada che é stada incö, jöbia ai 18 de jügn, tla sënta dla Presidënza dl Consëi di Ministri ál tut pert le Secreter de Stat Gianclaudio Bressa y i presidënc dles Regiuns y Provinzies cun n statut spezial, danter chisc ince le presidënt dl Südtirol Arno Kompatscher y le presidënt dl Trentin Ugo Rossi. La tematica zentrala dl’incuntada é stada la definiziun de n percurs deboriada che dess porté a n dessëgn de lege costituzionala che scries dant les prozedöres de mudaziun di Statuc dles autonomies en concordanza cun la reforma costituzionala. Pro la revijiun dl statut él nezesciar de n cheder de prozedöres definides tleramënter y le prinzip vëiga danfora che les mudaziuns pó ma gní fates cun n’acordanza detlarada da pert di consëis provinziai y regionai interessá.

Sön la basa de chësc prinzip, che é ince gnü inserí tla clausola de proteziun che le govern á impormetü da garantí tla reforma costituzionala che vëgn laurada fora dötaurela, á le Secreter de Stat Bressa fat la proposta, tolon insciö en conscideraziun les ghiranzes presentades de ma al premier Renzi da Kompatscher y Rossi, ales regiuns y provinzies cun n Statut spezial da mët adöm na comisciun aposta por ciafé n’acordanza sön le mecanism prestabilí cun na definiziun ince dles prozedöres d’atuaziun.

I laurs de preparaziun de chësta comisciun dess gní stlüc jö ala fin dl isté. „Al’intern de n cheder iuridich che reverda dötes les autonomies speziales messará le percurs metü man incö garantí le mantignimënt dles carateristiches particolares dles realtés desvalies, dantadöt por ci che reverda la defenüda y le potenziamënt dles competënzes“, á recordé Kompatscher.

rc

Galaria dales fotografies

Le presidënt Arno Kompatscher a Roma tratan l'incuntada sön les autonomies

L'incuntada sön les autonomies, a chëra che le presidënt Arno Kompatscher á tut pert, é stada incö tla sënta dla Presidënza dl Consëi di Ministri a Roma.
Foto USP