Atualità
Incuntades cun la laûrs: co se comporté
Ci él pa da fá canche an incunta na laûrs? L’osservadù ne dess nia lascé süa posiziun y ne dess gnanca s’avijiné ala laûrs por ti fá na foto: chësc sotlignëia l’Ofize provinzial Ciacia y pëscia che dá ince n valgügn consëis online. Al é da mët dër averda y da se tigní tres al dërt comportamënt canche an á n’incuntada cun na laurs.
La chestiun dla presënza de na laûrs tl Trentin Südtirol á indô porté tl zënter dl’atenziun di media y di zitadins la tematica dles incuntades cun na laûrs. L’Ofize Ciacia y pëscia ti á dediché a chësta tematica n valgönes plates online cun consëis y diretives da adoré canche an incunta por caje na laûrs tla natöra. I esperc recorda che les laûrs é ma te chël momënt agressives canche ares á la sensaziun da gní manaciades da valgügn, porchël él dër important da ne ti jí nia pormez.
La medema regola vel ince sce an ess da incunté de piceres laurs, deache les umes á n sentimënt de proteziun dër sterch y ares ne é gonot nia dalunc da sü pici. L’osservadú, prezisëia le diretur dl Ofize Andreas Agreiter, dess sun jí demez bel plan y ti lascé al tier tres na poscibilité da sun sciampé. Informaziuns plü monüdes é da ciafé sot ala plata internet dla Provinzia: www.provincia.bz.it/foreste/fauna-caccia/2691.asp
rc
