Atualità
Dala Junta: finanziamënc por 10 films y documentars
La Junta provinziala á dé incö ai 23 de jügn löm vërda ala secunda pert di finanziamënc dl 2015 por i films y documentars realisá te Südtirol. I esperc y la Business Location Südtirol (BLS) á chirí fora 10 proiec che gnará sostignis tres le Fonds por les produziuns dl Südtirol.
La condiziun prinzipala por ciafé n finanziamënt publich é che les produziuns televisives y/o cinematografiches mëss reinvestí te Südtirol almanco le 150 porcënt de chël che al ti é gnü conzedü. Insiö él preodü che cun n finanziamënt economich de 1,4 miliuns de euro ti röiel zoruch al Südtirol dai 10 proiec dl 2015 indöt 2,3 miliuns de euro. Sön le program él indöt 101 dis de produziun di films y documentars cun auturs, profescionisć y proponënc de sorvisc te Südtirol. „Indöt vëgnel sostigní cun chëstes mosöres de finanziamënt cincanta categories profescionales che prevëiga implü na seria de colaboraziuns strëntes cun artejans y imprejes locales“, á recordé le presidënt dla Provinzia Arno Kompatscher incö ai 23 de jügn tratan la conferënza stampa do la sentada dla Junta.
Döes dles produziuns aprovades vëgn dal Südtirol, döes dal rest dla Talia, öna dal’Austria y cinch dala Germania. Danter i anuzadus dles mosöres de sostëgn él trëi regisć südtirolej de documentars, implü vëgnel sostigní cun cater d'atri proiec les ativités dles sozietés de produziun dl Südtirol. Un di films ará sciöche paladina prinzipala le Ciastel Coira a Schulderns. Tres les indicaziuns dla Junta vëgnel finanzié produziuns olache an vëiga tleramënter che la "location" dl film é Südtirol o documentars che fej referimënt a Südtirol o proiec che promöi artisć locai y l’ativité dles ciases de produziun locales.
rc
