Atualità
Dala Junta: Pröm vare por sposté posć de laur dl setur publich tles valades
Porté i posć de laur tl setur dl’aministraziun publica y dles scores diretamënter tles valades ladines: chësc é le fin dla delibera aprovada ai 23 de jügn dala Junta provinziala sön proposta dl assessur ladin Florian Mussner che reverda n contrat d’afit por na gran pert di ofizi tla Ciasa de Palsa da denant a Piculin (San Martin).
La Junta provinziala á aproé en mertesc ai 23 de jügn te süa sentada edemala n contrat de afit de na gran pert di ofizi dla Ciasa de palsa da denant tla fraziun da Piculin a San Martin. Tres chësta dezijiun dessel gní integré tl frabicat de plü ofizi che pita sorvisc de consulënza scolastica y pedagogica y sorvisc por l’aministraziun publica diretamënter tl zënter dla Val Badia. Por le momënt é la Ciasa de Palsa da denant ince la sënta destacada dla direziun dles scolines dla Ladinia y di sorvisc de consulënza por le laur. „Cun chësc ampliamënt di sorvisc de consulënza y de aministraziun tl setur publich él nosc obietif da orëi sposté le potenzial de posć de laur por esperc dl setur dla scora y dl’aministraziun provinziala diretamënter tles valades ladines, ince deache la destanza danter Balsan y la Val Badia é massa grana por pendolars cuotidians“, insciö l’assessur por la scora ladina Florian Mussner.
Te chësc vers vá ince l’acordanza de coaliziun 2013-2018 che prevëiga n spostamënt di posć de laur dales cités tles valades por promöie les oportunités de laur, de abitaziun y de imprejes diretamënter söl post, insciö Mussner. Tres le performance plann dl Ciamp Inovaziun y Consulënza dl’Intendënza ladina dessél gní racoiü i sorvisc de consulënza scolastica y pedagogica, che atualmënter é spartis sö te plü sëntes tla Val Badia, tla sënta de Piculin, ince por podëi otimisé la coordinaziun di sorvisc cun na sënta prinzipala. Le proiet de avëi n zënter prinzipal di sorvisc tla Val Badia é gnü a s'l'dé ince tres l'interessamënt dla ispeturia dles scolines Edith Ploner y dl diretur dl Ciamp Inovaziun y Consulënza Felix Ploner. I partners de sotescriziun dl’acordanza é la Provinzia dl Südtirol y la fondaziun „Ciasa de Palsa Ojöp Frëinademetz“ cun süa sënta a San Martin de Tor.
rc
Galaria dales fotografies
