Atualità
Kompatscher ala conferënza Arge Alp: sostëgn por la Macroregiun alpina
Le presidënt dla Provinzia Arno Kompatscher y i suranstanc dles atres regiuns dla Arge Alp á aprové incö (26 de jügn) te n'incuntada a Lugano na ressoluziun por na strategia macroregionala unitara al'intern dl'Uniun Europeica. „La Macroregiun á le potenzial da realisé les ghiranzes dles regiuns alpines. Siöche sënta operativa ái fat la proposta de Bruxelles“, spliga Kompatscher.
![](/news/img/lazy.gif)
Avëi na strategia unitara por presenté te na manira organisada les ghiranzes coletives dles regiuns dles Alpes y avëi insciö plü suzes a livel europeich: chësc é l'obietif prinzipal di suranstanc dles Regiuns dla Macroregiun alpina, che s'á incunté incö, vëndres ai 26 de jügn, a Lugano tla Svizera. Por sotrissé chësc fin á i suranstanc dles Regiuns y Provinzies dles Alpes firmé incö na convenziun sön na planificaziun unitara dles aziuns futures dla Macroregiun alpina. „Adorunse pordërt dlungia l’Euregio sëgn ince ciamó n’atra istituziun? La resposta é tleramënter sce, deache l’Arge Alp é la rapresentanza unitara di interesc dles regiuns alpines, tres chëra che al é poscibl da porté inant y planifiché adöm proiec concrec tl'Uniun Europeica“, á splighé le presidënt dla Provinzia Arno Kompatscher che á ince sotligné l’importanza dla creaziun de n meso de comunicaziun unitar de düc i raiuns dles Alpes a livel europeich.
Les diretives prinzipales dla Macroregiun alpina é bele gnüdes stabilides tles incuntades da denant, sëgn vëgnel lauré sön la realisaziun concreta. Le presidënt Arno Kompatscher á porchël proponü incö l’ofize dla Euregio Südtirol-Trentin-Tirol a Bruxelles sciöche sënta operativa dl'Arge Alp. „I ne orun nia cherié strotöres y ofizi nüs, mo s’anuzé dles istituziuns bele esistëntes ince por sparagné ressurses y cherié sinergies. Nosc ofize a Bruxelles foss insciö na buna ocajiun de rapresentanza ince por la Macroregiun alpina, ince por merit dles esperiënzes maturades ti ultims 20 agn y por la comunicaziun che vëgn bele dötaurela fata te plü lingac“, insciö le presidënt.
I suranstanc dles regiuns dla Arge Alp á ince confermé tleramënter che le rode dles regiuns é fondamental por ci che reverda les competënzes de coordinaziun y de govern al’intern dla colaboraziun cun i Stac nazionai y l’UE. „I obietifs prinzipai dla Macroregiun alpina é n svilup sostenibl dantadöt por ci che reverda i raiuns da munt, i coliamënc dla mobilité y dla vëta leria, sciöche ince la sconanza dles ressurses“, prezisëia le presidënt Arno Kompatscher. Te chësc contest á le Ciantun Tessin dla Svizera presenté incö n proiet por la re-naturalisaziun de rüsc, la Provinzia de Südtirol á indere porté inant n proiet por l’Agenzia Clima sön l’efiziënza energetica y sön la sconanza dl clima. Tres le proiet dl’Agenzia Clima dessel gní inrescí le livel de sparagn energetich dla politica dles regiuns alpines. Cun l’incuntada da incö é la presidënza dl Tessin jüda a piz, le proscim ann surantolará chësta inciaria le Vorarlberg.
rc