Atualità
Dala Junta: jöbia y vëndres Kompatscher a Roma y a Viena
Dui termins, chësta edema, por le presidënt dla Provinzia de Balsan, Arno Kompatscher: en jöbia ai 2 de lugio é söl program a Roma n’aldiziun al’Autorité antitrust por ci che reverda la fujiun danter SEL y AEW, en vëndres ai 3 de lugio sará le suranstant dla Junta a Viena por incunté i presidënc Heinz Fischer y Sergio Mattarella.
Le pröm termin á le presidënt dla Provinzia en jöbia domisde ai 2 de lugio por ci che reverda l’aldiziun pro l’Autorité antitrust che controlëia la concorënza y le marcé. Tratan l’aldiziun gnarál traté la fujiun danter SEL y AEW che portará ala nasciüda de na sozieté unitara nöia, en coproprieté dla Provinzia y di Comuns y che sará ativa tl setur energetich. „Al se trata de n passaje d'oblianza preodü dala lege che l’antitrust vëgnes ativa canche al se trata de fujiuns de na certa grandëza“, á sotligné le presidënt Kompatscher che á ajunté inant: „I sun confidënt che les valutaziuns dl Garant sará positives, y i sperun te na löm vërda por podëi rové a contlujiun dla fujiun.“
Do l’aldiziun da pert dl’autrorité garanta dla concorënza y dl marcé se metará Kompatscher söl iade por Viena, olache al é preodü en vëndres ai 5 de lugio n’incuntada danter le presidënt dla Republica taliana, Sergio Mattarella, y le presidënt dla Republica dl’Austria, Heinz Fischer, a chëra che le presidënt dla Provinzia é gnü invié a tó pert.
rc
